-
Bild 1 von 7Legenda: Attatga sin club en il center da la citad da Istanbul. Keystone -
Bild 2 von 7Legenda: Ambulanzas stattan en colonna davant il club. Keystone
-
Bild 3 von 7Legenda: Tut tranter l'auter èn las persunas pertutgadas. Keystone
-
Bild 4 von 7Legenda: Policists stattan davant il club Reina. Keystone
-
Bild 5 von 7Legenda: Policists stattan amez flurs che passants han plazzà davant il club Reina. Keystone
-
Bild 6 von 7Legenda: L'entrada dal club ad Istanbul. Keystone
-
Bild 7 von 7Legenda: Bleras persunas èn vegnidas ed han plazzà chandailas e rosas davant il club. Keystone
En il club Reina, in dals pli gronds ad Istanbul, a la riva dal Bosporus ha in attentader cumenzà a sajettar sin ils giasts dal club curt suenter mesanotg. 39 persunas moran, almain 70 èn blessadas. Tenor las autoritads d'Istanbul saja l'attatgader penetrà en il club suenter ch'el aveva sajettà giu a l'entrada in policist ed ina persuna civila.
En il club eran fin 800 persunas vi da festivar Son Silvester. Ord tema d'attentats pussaivels la notg da Son Silvester eran radund 17'000 policists en servetsch la notg passada ad Istanbul. Dals attentaders d'Istanbul manca anc adina mintga fastitg. Anc è nagin sa declerà d'avair comess l'attentat.
24 persunas da l'exteriur
Da las 39 persunas sajan 24 da l'exteriur. Tenor infurmaziuns da medias sajan las unfrendas dal'exteriur da la Saudi-Arabia, Marocco, il Libanon, Libya, Tunesia, Frantscha, Israel ed India. Svizzers na sajan betg pertutgads.
Sco il departament federal da l'exteriur ha communitgà na sajan - tenor las enconuschientschas da fin ussa - nagins Svizzers tranter las unfrendas.
Erdogan vul cumbatter il terrorissem
Il president Recep Tayyip Erdogan ha ditg da vulair cumbatter vinavant fermamain il terrorissem. La Tirchia vegnia a far tut per garantir la segirezza e la pasch per lur burgais. Finamira dals terrorists saja da procurar per caos.
Il mund reagescha consternà suenter l'attatga
Il minister da l'exteriur svizzer, Didier Burkhalter condolescha a la Tirchia suenter l'attatga sin il club ad Istanbul. Ultra da quai vegnia sclerì sch'era Svizzers u Svizras sajan tranter las unfrendas, scriva il Departament federal d'affars exteriurs.
La regenza americana condemnescha a moda vehementa l'attatga ad Istanbul. Il president american Barack Obama ha plinavant confermà da sustegnair la Tirchia en ses cumbat cunter il terrorissem.
Era la regenza tudestga reagescha consternada sin l'attatga. Els condoleschian a tut las persunas pertutgadas, uschia l'uffizi per affars exteriurs tudestg. Cun pleds sumegliants han era reagì l'incumbensada per affars exteriurs da l'Uniun Europeica Federica Mogherini ed il secretari general da la Nato Jens Stoltenberg.
RR Novitads 06:00