Tgei che pertutga la protecziun da datas n'era Facebook fin ussa betg il meglier exempel. La campagna da scleriment da la rait sociala pudess dentant midar quest maletg. Facebook infurmescha ils utilisaders co proteger meglier lur datas.
Pli simpla administraziun
La rait sociala ha dà scleriment davart las datas ch'ella rimna e co quellas vegnan duvradas. Per ils utilisaders duaja era l'administraziun dals parameters per la sfera privata vegnir pli simpla. Cun filmins vul Facebook dar tips als utilisaders. La campagna cuzza tochen la fin favrer.
Workshops per fatschentas
Part da la campagna da scleriment fan era workshops per fatschentas pitschnas e mesaunas. Tar quels workshops veglia la rait sociala cunzunt infurmar davart il reglament da basa da protecziun da datas. La nova lescha da l'Uniun europeica va en vigur la fin da matg.
Facebook è adina puspè vegnì en la critica pervia dal rimnar datas da lur utilisaders e da silsuenter dar enavant quellas. La finala viva l'interpresa sco plattafurma da reclama.
RR novitads 14:00