En la dispita davart il Brexit instradescha la cumissiun da l'UE ussa pass giuridics cunter Londra. Quai pervia da la violaziun dal contract da sortida.
La raschun è la lescha dal martgà intern che la chombra dals deputads britannics aveva decidì il mardi. Quella vul tranter auter stritgar parts da la cunvegna da sortida che vala gia. Concret vai per las controllas da duana cun l'Irlanda dal Nord, la provinza da la Gronda Britannia.
La cumissiun da l'UE aveva dà in ultimatum a la regenza britannica! Enfin ier, mesesmna, avess quella stuì prender enavos la clausula dispitaivla en la lescha. Cunquai che quai n'è dentant betg capità ha l'autoritad a Brüssel tramess ina denunzia uffiziala a Londra. La presidenta da la cumissiun europeica, Ursula von der Leyen, dat uss in mais temp a la regenza britannica da prender posiziun. Igl è l'emprim pass dad ina procedura che pudess la finala finir davant il tribunal europeic.