Nus dain in sguard sin la situaziun actuala dad in pèr pajais turistics:
Mesemna, ils 13 da matg 2020, ha la Confederaziun communitgà che davent dals 15 da zercladur vegnian averts ils cunfins da la Svizra cun la Germania , l' Austria e la Frantscha . Vacanzas a la mar èn damai pussaivlas en Germania ed en Frantscha. Co vesi però ora en las autras destinaziuns da vacanzas?
- Italia: Ils cunfins cun la Italia restan vinavant serrads, uschia che vacanzas da stad en Italia èn pauc probablas. Il primminister Giuseppe Conte di però, che turissem intern en l'Italia duai esser pussaivel questa stad.
- Grezia: Gia il 1. da fanadur duain las rivas grecas puspè vegnir visitadas da turists e turistas. Co che quai duess funcziunar vul la regenza greca declerar ils proxims dis en ina plan da tschintg puncts. Sco emprim lavuran ils responsabels uss vi da novas disposiziuns dad igiena e sanadad per il turissem.
- Portugal: Il pajais ha pli paucs malsauns da Covid-19 sco per exempel il pajais vischin, la Spagna. Perquai spera il turissem da savair profitar da quest image sco «pajais bunamain liber da Corona». Possessurs dad hotels speran da pudair beneventar giasts esters gia il fanadur.
- Spagna: Las schanzas da pudair far vacanzas da stad en Spagna èn minimalas, di la redactura da l'exteriur da SRF Melanie Pfendler. Suenter calculaziuns da la regenza spagnola pudessan ils cunfins esser serrads anc fin l'october.
La Confederaziun svizra recumonda dentant:
Faschai vacanzas en Svizra! Dai ora ils raps qua! Visitai las bellezzas da la natira, faschai sport, giudai il bun da mangiar, il bun vin, la biera, l'aua, tut quai che nus avain!
