RTR: Ier essas Vus stada sin la plazza da Son Peder en il Vatican entant ch'i ha pluvì detg ferm - va questa trid'aura er gist a prà cun l'atmosfera al lieu?
Simona Caminada: Quai pon ins definitivamain dir uschia, be ch'igl aveva tuttina ina massa glieud sin la plazza da Son Peder. Mumentan ha lieu l'onn sontg en il Vatican, e bleras pelegrinas e blers pelegrins vegnan a Roma. Mo era sch’i aveva blera glieud sin la plazza poss jau dir ch'igl era ruassaivel e l'atmosfera era propi trista. Ins sentiva che insatge na è betg en urden.
Papa Francestg vala sco optimist, sentan ins en il Vatican insatge da quella positivitad ubain d’ina fidanza en Dieu?
Tar quella glieud ch’jau hai discurrì ils davos dis, hai jau sentì quella confidenza. Jau hai sentì la speranza che Papa Francestg turna puspè en il Vatican e che i va prest meglier cun el. Ma ins senta en mintga cas era ina tscherta tema. Las persunas han ditg a mai, ch'ellas fetschian uraziuns en quels dis. Ier saira per exempel hai dà in rusari sin la plazza da son Peder cun ils cardinals ed ils cartents. Plirs tschients cartents eran là e quels rusaris vegnan ussa repetids mintga saira sin la plazza ed er en autras tiaras, nua ch'i dat er messas per il Papa.
Actualmain è l’onn da pelegrinadi a Roma, ed la citad vuless sa mussar da sia vart la pli bella. Sentan ins ussa tras la situaziun da sanadad dal Papa ina tscherta franada dal entusiassem en la citad?
Quai è grev da respunder, il favrer marscha en general pli pauc qua a Roma. Tuttina hai pelegrins e dapi las davosas emnas sentan ins era ch'il dumber crescha. Jau crai che quels ch'han planisà il viadi da pelegrinadi, vegnan tuttina per ir atras la porta sontga - magari era per esser ussa anc pli datiers al Papa e da far uraziuns per el en il Vatican.
I dat a Roma para anc in ulteriur indicatur che mussa ch'i capita insatge extraordinari.
Gea, dapi che Papa Francestg è en l'ospital, datti ina extrem gronda preschientscha da las medias, per exempel davant l'ospital Gemelli, nua ch'il Papa è mumentan. Era sch’i na dat là betg dapli infurmaziuns davart sia sanadad, èn las medias al lieu. Igl ha dà muments ils davos dis nua ch’i aveva bler dapli medias che cartents al lieu.
Ch’i ha ussa uschè blera glieud da las medias avant lieu, è quai er perquai ch'els survegnan qua ina u l'autra infurmaziun secreta u danunder survegnan ellas insumma mintgamai las infurmaziuns davart il stadi actual?
Nus schurnalistas e schurnalists survegnin uschenumnads bulletins, pia rapports dal Vatican. La damaun datti in pitschen update. Là stat scrit sco che Papa Francestg ha durmì, sch’el ha maglià ensolver ed anc dapli. Il pli impurtant vegn pir la saira. Lura datti las infurmaziuns davart il di, las novitads dals tests medicinals e las analisas ch'els han fatg quel di. I dat er ina survista vasta sco ch'i va insumma cun il Papa ed enfin oz n'hai dà praticamain naginas infurmaziuns dasper quels rapports dal Vatican. Quai ha era da far cun il fact che mo paucs han contact cun Papa Francestg – in pèr medis e tgirunzas en l'ospital, fitg paucas persunas da fidanza e paucas visitas. Mo tge ch'i dat pli ch'avunda èn speculaziuns. Ed il Vatican ha gia pliras giadas stuì dar scleriment u prender posiziun davart quellas speculaziuns.