- Cun ina ceremonia festiva è la Finlanda vegnida prendida si a Brüssel en la Nato.
- Suenter in process d’adesiun da gnanc in onn è il pajais nordic daventà il 31avel commember da l’allianza mundiala da defensiun, la Nato.
-
Bild 1 von 2Legenda: La Finlanda daventa ils 4 d’avrigl il 31avel commember da l’allianza. Keystone -
Bild 2 von 2Legenda: Il president finlandais Sauli Niinisto sa participescha a l’inscunter dals ministers da la NATO en il quartier principal da l’allianza a Brüssel. Keystone
Tge munta quell'entrada per la Nato?
Per ils stadis commembers ha l’adesiun da la Finlanda en la Nato per consequenza in’obligaziun da prestar agid. Sche la Finlanda, che cunfinescha cun la Russia, vegniss attatgada, vegniss quai considerà sco attatga sin tut ils stadis da la Nato. Uschè fiss mintga allià dumandà da prestar agid.
A medem temp daventa l’allianza pli gronda e ferma. Tenor indicaziuns dal secretari general da la Nato, Jens Stoltenberg, posseda il pajais da forzas armadas bain equipadas. La Finlanda investescha en passa 60 aviuns da cumbat dal tip F-35. Pervia da la situaziun geografica da la Finlanda pudessan per exempel ils stadis baltics da la Nato: l’Estonia, la Lituania e la Lettonia vegnir defais meglier en cas d’ina attatga.
La grondezza da las forzas armadas finlandaisas vegn inditgada cun 19’000 umens e dunnas, vitiers vegnan var 238’000 reservists. Per proteger ils cunfins dal pajais posseda la Finlanda var 100 chars armads da cumbat dal tip Leopard 2A6 sco era tschients chanuns d'artigliaria.
Tge munta l'extensiun da la Nato per la Russia?
Putin ha fatg cler ch’el haja in grond problem cun l’extensiun da la Nato en direcziun da la Russia. Consequentamain ha Moscau reagì ils mais passads sin il process d’adesiun. Il ministeri da l’ambient russ ha crititgà ch’ina adesiun da la Nato al vischin vegnia a far donn a las relaziuns russ-finlandaisas. «La Russia vegn ad esser sfurzada da respunder correspundentamain – en la tecnica militara ed en in auter reguard – per tegnair quint dals privels en vista a sia segirezza naziunala», hai gì num gia il matg en ina communicaziun dal ministeri.