Il retg da la Gronda Britannia Charles ha cancer. Quai ha communitgà il palaz da Buckingham sur la plattafurma X.
Il retg haja cumenzà glindesdi cun in tractament medicinal. Termins publics na vegnia el betg a frequentar, cun fatschentas statalas veglia el dentant cuntinuar. El saja sa decidì d'infurmar davart sia diagnosa per evitar speculaziuns. Plinavant speria el ch'i gidia tar la chapientscha per tut quels sin l'entir mund che sajan pertutgads da cancer.
Tge sort da cancer ch'il retg Charles ha n'han ins betg communitgà. Mo ch'i n'haja betg in connex cun la malsogna da prostata benigna. Pervida quella è il monarch da 75 onns vegnì tractà dacurt en l'osptial.
Il prinzi Harry vul visitar ses bab ils proxims dis. L'um da 39 onns che viva en ils Stadis Unids haja discurrì cun ses bab suenter la diagnosa, uschia l'agentura DPA.
Politichers giavischan in bun meglierament
«Jau giavisch a sia maiestad ina guariziun cumpletta e sperta», ha scrit il primminister Rishi Sunak sin X. «Jau n’hai nagins dubis ch’el vegnia puspè ad esser cumplainamain abel da s’engaschar en curt temp, ed jau sai che l’entir pajais giavischa ad el tut il bun.» Er il manader da l’opposiziun, Keir Starmer, ha giavischà al retg Charles il meglier per sia guariziun. «Nus ans legrain da vesair el bainbaud puspè cun tutta sanadad.»
Biden fa uraziun per che il retg britannic guarescha svelt
«Jau fatsch quitads per el», ha il president dals Stadis Unids, Joe Biden ditg a l'ur d'in termin a Las Vegas tenor indicaziuns da reporters. El haja pir curt avant savì da la diagnosa e speria da pudair discurrer bainprest cun Charles.
Pli tard ha Biden scrit sin X, il tractament d'ina diagnosa da cancer e tut quai che vegn suenter dovria speranza e curaschi. El e sia dunna Jill han urà per ina guariziun sperta e cumpletta dal retg.
