330 deputads han vuschà per, 231 cunter. Che la lescha per ratifitgar la cunvegna da sortir l'Uniun europeica vegnia approvada, è cundiziun per pudair realisar il Brexit ils 31 da schaner 2020. Quest pass possia puspè bajegiar si la fidanza en il parlament e la democrazia, ha ditg il minister da Brexit, Steven Barclay durant la debatta.
Ussa ston anc la chombra dals Lords ed il parlament da l'UE approvar questa lescha. Sche la chombra dals Lords fa anc midadas vid la lescha, stuess la chombra da deputads anc ina giada votar. I vala dentant sco tant sco segir ch'i na dat naginas midadas substanzialas pli. Dapi la victoria gronda dals conservativs da Johnson tar las elecziuns l'onn passà, n'èsi betg da spetgar ch'il parlament resistia anc pli fitg. Ils temps da decisiuns stretgas èn passads.
Fin la fin dal 2020 duai la Gronda Britannia anc restar en ina fasa transitorica, durant quella vegn a sa midar tant sco nagut. Durant quest temp ston Londra e Brüssel sa cunvegnir davart las relaziuns futuras. Sche quai vegn a gartegiar en uschè in curt temp, è dentant dispitaivel.
Ils 20 da december - l'emprim pass:
RTR novitads 20:00