Per blers è New York ina citad da siemi, per Aita Pult èsi il lieu da lavurar e da viver. La diplomata oriunda da Ftan è ina dad 8,8 milliuns persunas che vivan en la metropola.
Viver a New York è adina ina surpraisa. Ins vesa trasora novas chaussas, jau ma vegn mintgatant avant sco en in film.
Il tempo enorm da la citad haja era in effect sin ella: dapi ch'ella vivia a New York, saja ella vegnida pli svelta cun pensar e cun chaminar.
Lavur sco diplomata
Dapi il 2020 lavura Aita Pult en il consulat general svizzer sco scheffa da cultura a New York. Ses biro sa chatta en in sgrattanivels amez Manhattan, en la 30avla auzada. Ord fanestra vesa ella sin il bajetg da l'Empire State. En sia lavur fa Aita Pult attent sin las differentas fassettas da la Svizra. Ella fa punts per far pli enonuschenta la Svizra. La valur economica da la Svizra en ils Stadis Unids saja remartgabla. La Svizra saja il 7avel grond patrun da lavur en ils Stadis Unids, cun in mez milliun jobs.
Impressiuns d'in di da lavur
-
Bild 1 von 12. Viadi a la lavur. Traffic e canera amez Manhattan. Bildquelle: RTR.
-
Bild 2 von 12. In biro cun bella vista. Aita Pult en ses biro en la 30avla auzada. Bildquelle: RTR.
-
Bild 3 von 12. Vista ord biro. Il renumà bajetg da l'Empire State. Bildquelle: RTR.
-
Bild 4 von 12. Sin la porta dal biro. Qua tatga in salid da la patria. Bildquelle: RTR.
-
Bild 5 von 12. Vista deluxe. Il consulat general sa chatta en la 30avla auzada amez Manhattan. Bildquelle: RTR.
-
Bild 6 von 12. Sesida da team. Aita Pult maina ina sesida cun collavuraturas dal consulat general. Bildquelle: RTR.
-
Bild 7 von 12. Grand Central Station. La staziun da tren sa chatta datiers da ses lieu da lavur. Bildquelle: RTR.
-
Bild 8 von 12. Sco in furmicler. Tgi chatta la diplomata? Bildquelle: RTR.
-
Bild 9 von 12. Pausa da la citad. Mintgatant dovra ella ina pausa da la fulla da la citad. Bildquelle: RTR.
-
Bild 10 von 12. La vernissascha. Il consulat general envida ad in'occurrenza d'art. Bildquelle: RTR.
-
Bild 11 von 12. La vernissascha. Aita Pult, scheffa da cultura, tegna in pled d'avertura. Bildquelle: RTR.
-
Bild 12 von 12. La vernissascha. Il consul general Niculin Jäger, l'artist Greg Parma Smith ed Aita Pult. Bildquelle: RTR.
Arrivada il 2020
Ses cumenzament a New York saja stà grev. Arrivada la stad 2020 en il temp da la pandemia, era la citad in'autra. Tut era quiet, la populaziun anc sut schoc dals mais passads. Oz ha la citad puspè chattà la via en la normalitad, ed era il mintgadi dad Aita Pult è sa normalisà.
Job da siemi
Dapi ses praticum a Paris avant radund diesch onns en l'ambassada svizra, saveva ella ch'ella veglia daventar diplomata. Ella dumogna lura l'examen d'admissiun pretensius. Ses emprim stage diplomatic è stà a Tunis, silsuenter ha ella lavurà quatter onns a Berna. New York è sia terza staziun sco diplomata. En in onn mida ella puspè lieu. Nua che quai vegn ad esser, na sa ella anc betg.
Esser diplomata è mes job da siemi. Mintga quatter onns in nov lieu, in nov team e novs temas. Ed adina puspè avair questa sfida.
