Il Cussegl federal ha oz mesemna concedì ina contribuziun supplementara da 33 milliuns francs per l'agid umanitar en l'Afganistan. En tut datti enturn 60 milliuns francs entaifer ils proxims 16 mais. La Svizra reageschia cun quest augment sin la situaziun difficila en il pajais, communitgescha il Departament federal d'affars exteriurs. Il colaps economic imminent, la greva setgira e la fom vegnian anc ad augmentar il dumber da persunas che dovrian sustegn umanitar.
Afganistan è in pajais sutsviluppà
La Svizra sustegna dapi l'onn 2002 il pajais en l'Asia Centrala cun 27 milliuns francs ad onn. 18 milliuns èn per la cooperaziun al svilup e nov milliuns èn agid umanitar. L'avust 2021 ha la Confederaziun stuì serrar temporar il biro a Kabul pervia dals Talibans. La collavuraziun cun l'ONU , il Comité internaziunal da la Crusch Cotschna ed autras organisaziuns nunguvernamentalas internaziunalas è stretga.
La Confederaziun beneventa era la conferenza da l'ONU ils 13 da settember a Genevra per discutar la situaziun umanitara.
