Er da la partida saja il secretari general da l’ONU, António Guterres. L’agid finanzial duaja vegnir augmentà tant pli spert per che la missiun umanitara possia vegnir cuntinuada. Passa la mesadad dals 38 milliuns abitants da l’Afganistan dovrian agid umanitar. Il minister da l’exteriur, Ignazio Cassis, ha beneventà ils plans da l’ONU.
Co collavurar cun ils Talibans?
Er l’Uniun europeica s’occupescha actualmain cun la situaziun en l’Afganistan. Concret haja ella definì tschintg reglas fundamentalas davart la collavuraziun cun ils Talibans. Quai ha ditg l’incumbensà per l’exteriur da l’UE, Josep Borrell. Ils dretgs umans stoppian vegnir respectads ed il pajais na dastgia betg daventar in refugi per terrorists.
En la regenza transitorica na dastgia betg mo dar Talibans, l’agid umanitar stoppia pudair vegnir en il pajais ed ils Afgans che veglian bandunar il pajais, stoppian pudair far quai senza restricziuns. La finamira da l’UE saja d’evitar ina catastrofa umanitara e d’impedir in’unda da fugitivs en direcziun da l’Europa.
