La Partida liberaldemocratica dal chantun Grischun ha quatter persunas interessadas per in sez en la regenza grischuna. Quai èn Vera Stiffler da Cuira, Martin Bühler da Fideris, Urs Marti da Cuira e Maurizio Michael da Castasegna, uschia ha la partida communitgà. La candidata ed ils trais candidats èn pronts per il proceder da nominaziun da la PLD. A la radunanza da nominaziun dals 6 d'october decida la partida lura tgi che va en la cursa per in u plirs sezs en la regenza grischuna.
Dals quatter candidats han trais experientscha politica. Sulettamain Martin Bühler n'ha enfin uss betg gì uffizis politics. In appel da la partida e plirs ch'hajan plidentà el en quest connex haja motivà Bühler da sa metter a disposiziun per ina nominaziun eventuala. Sper quai haja el en tut sias funcziuns fin qua gì bler contact cun l'executiva, uschia ha declerà l'um dal Partenz sia motivaziun envers RTR.
Elecziuns il matg 2022
Pervi da la limitaziun dal temp d’uffizi, vegnan libers dus sezs en la regenza, numnadamain quels da Mario Cavigelli e da Christian Rathgeb. Las elecziuns da la regenza èn ils 15 da matg 2022.