Il proxim temp èsi da far quint ch'i dat dapli observaziuns da lufs en il Grischun, quai communitgescha l'Uffizi chantunal da chatscha. La raschun saja che la selvaschina d'ungla sa muventa il cumenzament da l'enviern pli datiers dals vitgs ed uschia er ils lufs.
Per ils umans n'exista da princip er durant quest temp nagin privel pli grond. Activitads da temp liber dastgan vegnir pratitgadas vinavant sco fin ussa.
L'uffizi da chatscha fa però attent, sch'il luf chattia funtaunas da pavel en ils abitadis possia el sa disar a media vista vi da l'uman. Perquai saja impurtant d'allontanar consequentamain funtaunas da pavel che vegnan en dumonda per il luf u la selvaschina. La finala duai tgi che inscuntra in luf contactar immediatamain la surveglianza da chatscha locala.
Ord l'archiv
Il schaner 2020 ha in luf traversà la pista d'uffants, la loipa e la via chantunala a Sursaissa Chummenbüehl. Il Telesguard ha rapportà.
