Era sche las cifras da corona creschan ed i dat mintga di enturn 1000 novas infecziuns en il Grischun, na dovria quai naginas novas mesiras, di la media chantunala Marina Jamnicki. Plitost en il focus è ussa la dumonda, cura e tge mesiras ch'ins pudess bainprest schluccar. Quai perquai che ins haja la capacitad da gidar mintgin che dovra agid medicinal – pia actualmain naginas stretgas.
Jamnicki defenda isolaziun scursanida
Er sche fin la mesadad da las persunas ch'èn en isolaziun pervia da corona ston prolungar quella, defenda la media chantunala Marina Jamnicki la decisiun da scursanir il temp d'isolaziun da 10 sin 5 dis. Bleras persunas n'hajan nagins sintoms, e fissan uschia «per nagut» en isolaziun. Il temp d'isolaziun pli curt haja uschia l'avantatg che persunas senza sintoms pon bandunar quella suenter 5 dis. Quellas persunas ch'han vinavant sintoms pon prolungar quella per 3 dis via in sistem automatisà. Per bandunar l'isolaziun prolungada èsi dad esser almain 48 uras senza sintoms.
Dapli giuvens che vegls s'infecteschan
Tuttina datti mintga di massa novas infecziuns; quai surtut tar persunas giuvnas tranter 10 e 49 onns. Ils motivs sajan che la glieud veglia sa protegia meglier cun respectar las mesiras sco distanza e las mesiras da higenia. Tiers saja la vaccinaziun da booster era pli derasada tar glieud da 50+ che tar persunas giuvnas.
Omicron strusch sin l'intensvia
Las bunas novas sajan ch'ils infectads d'omicron na dovrian betg uschè sustegn medicinal. E tuttina na possian ins betg congualar la varianta omicron cun ina normala grippa. Per lez èn las cifras d'infecziuns anc memia autas. Ins è però optimistic che l'unda d'omicron passia en il decurs da la primavaira e ch'ins possia planisar las vacanzas da stad senza restricziuns, ha ditg Jamnicki.
