En il chantun Grischun duai er suenter las vacanzas da stad dar regularmain tests da corona en las scolas. Quai ha confermà il stab da crisa dal chantun envers RTR. Argumentà ha el questa decisiun cun la “varianta Delta” che saja pli contagiusa, ma er cun il fatg che bleras persunas turnian uss da las vacanzas. Per las scolaras ed ils scolars restian ils test da corona dentant vinavant facultativs. Fin la primavaira 2022 vegnan ils tests en las scolas cuntinuads en il chantun Grischun
Testà var 22'000 scolaras e scolars
Bunamain tut las scolas èn sa participadas als tests durant il semester passà. Durant l'onn da scola passà èn vegnids evaluads en media 1'800 pools per emna. Var 22'000 scolaras e scolars sco er persunas d'instrucziun han pudì vegnir testads mintga emna sin Covid-19.
136 cas singuls positivs
Fin ussa èn vegnids testads 27'000 pools. En quest connex èn vegnids eruids 136 cas singuls positivs. Las chadainas d'infecziun èn vegnidas interruttas. Tras ils vasts tests en las scolas èsi stà pussaivel da mantegnair da tut temp l'instrucziun da preschientscha.
L'obligatori da mascrinas per scolastas e scolasts aveva il Grischun laschà crudar l'entschatta fanadur - en las scolas popularas publicas e privatas.
Era auters chantuns testeschan vinavant
Plirs auters dals 20 chantuns che cumenzan la scola glindesdi han annunzià da cuntinuar cun la strategia e far ils tests da massa sin basa voluntaria. Uschia ils chantuns da Berna, Sursilvania ed Uri.
L'obligatori da mascrinas vulan ils chantuns per part era evitar. Uschia han tenor l'agentura da novitads svizra SDA ils chantuns Berna, Glaruna, Giura ed Uri annunzià d'abolir l'obligatori da mascrinas era per scolastas e scolasts – e quai independent dals tests da massa emnils. En il center stettia da pussibilitar l'instrucziun da preschientscha.
Magistraglia svizra cunter mascrinas e per tests
Mardi passà aveva la federaziun da la magistraglia svizra pledà per abolir l'obligatori da mascrinas era per scolastas e scolasts. Da l'autra vart è la federaziun s'exprimida en favur dals tests da massa sistematics - e dad envidar il persunal da scola da sa laschar vaccinar.