Malgrà ch'ils glatschers han pers il 2021 uschè pauc glatsch sco dapi il 2013 betg pli èn quels sa reducids per bunamain 1%. U per dir cun auters cifras: Radund 400 milliuns tonnas glatsch èn ids a perder en Svizra. Quai malgrà ch'i ha dà massa naiv l'enviern passà e che la stad 2021 è stada plitost frestga.
Bain haja la gronda cuverta da naiv protegì il vadrets fin il fanadur, fin la fin da settember, sajan ils glatschers dentant luads relativamain fitg.
Gigant Silvretta lieua e lieua
In sguard sin il vadret dal Silvretta sin il cunfin da l'Austria ed il Grischun mussa ch'era l'aura frestga e bletscha na po betg franar ch'il glatsch lieua. Il glatscher Silvretta è in coloss situà tranter 2'500 e bun 3'000 meters sur mar. Er quest gigant daventa dentant pli e pli pitschens. Ils ultims tschintg onns haja il glatscher pers 10-20 meters grossezza, di Andreas Bauder, glaziolog tar la rait da mesiraziun da glatschers Glasmos.
Giudim il glatscher dal Silvretta, sin l'uschenumnada lieunga è lieuada il 2021 ina vetta da glatsch da var dus meters. Be sisum il vadret sajan restads radund 70 centimeters naiv da l'ultim enviern. Pia era l'onn 2021 che n'è insumma betg stà in onn da chalira, n'ha betg pudì franar la luentada dals glatschers. Tuttina èsi uschia ch'i è luà uschè pauc glatsch sco dapi il 2013 betg pli.