Ils resultats da las elecziuns n'èn betg ina surpraisa. E tuttina pon ins discurrer d’in resvegl politic – almain en il parlament. La politica grischuna daventa pli multifara, pli diversa, pli polarisada ed er pli gista. E quai fa bain. Pervi da la relaziun da forzas ineguala è il parlament stà memia plaun sin via ils ultims onns, ina tscherta cumadaivladad è stada da sentir. La nova constellaziun e tras quai er la diversitad da las perspectivas vegnan speranza a gidar da rumper or da la zona da confort.
Las partidas èn sfurzadas da sa posiziunar puspè pli cler, da cumbatter per lur schliaziuns ed er da chattar novas coaliziuns. Consequentamain daventi en l'avegnir er pli difficil per tscherts dossiers sco per exempel il clima, il luf u er la cultura.
Er la regenza – ch’è vinavant surrepreschentada e qua tras er vinavant dominada da las forzas dal center – vegn a fruntar sin dapli cuntravent en l’avegnir. A la vart dretga – ch’ha danovamain manchentà cleramain in sez en l’executiva – resta be la via da l’opposiziun.
Flavio Bundi
schefredactur RTR
