La primavaira è arrivada. Igl è temp da prender or il velo. Entant datti sper ils velos adina dapli velos cun motor, ils e-bikes. Ina survista da las pli impurtantas prescripziuns e reglas ch'il vala da resguardar sch'ins è sin via sin duas rodas.
Suenter ch'ins n'ha betg duvrà il velo per insaquant temp vegni recumandà da controllar il velo: Controllar ils frains, pumpar ils pneus ed unscher la chadaina. Cun velos, e-bikes ed era e-trottinets na dastg'ins betg ir sin il passadi da peduns mabain ins sto ir sin via u sin las vias da velo. Per velos «normals» ed e-bikes datti perscripziuns che valan per tuts; per e-bikes datti dentant anc prescripziuns supplementaras. Mintga velo sto tenor «pro Velo Svizra» avair:
Quai sto il velo avair
Avrir la boxSerrar la box
pneus pumpadas
dus frains ferms
reflecturs cun ina surfatscha da minimum 10 centimeters quadrat; davant alv, davos cotschen
reflecturs oranschs vi da las pedaleras (na vala betg per velos da cursa)
tranter di e notg en tunnels e la notg davant ina glisch alva, davos ina glisch cotschna ( betg sbrinzlanta)
In scalin n'e dapi il 2017 betg pli obligatoric. Per ils e-bikes datti dentant prescripziuns spezialas. Qua vegni distinguà tranter duas sorts dad e-bikes ils «plauns» ed ils «sperts». Ils «plauns» che pon cuntanscher in tempo maximal da 25 km/h ed ils e-bikes «sperts» che pon cuntanscher in tempo maximal da 45km/h.
Reglas spezialas per e-bikes:
Avrir la boxSerrar la box
Per ils «plauns» fin 25 km/h vala:
persunas da 14 fin 16 onns ston avair ina patenta da moped (categoria M)
persunas sur 16 onns na dovran nagina patenta
scalin obligatoric
Per ils «sperts» fin 45 km/h vala:
immatriculaziun => numer mellen obligatoric
per tuts: almain patenta da moped (categoria M)
scalin obligatoric
chapellina obligatorica
Duas novas reglas per e-bikes a partir dals 1. avrigl 2022:
Mintga e-bike (sco tar l'auto) sto avair glisch era durant il di.
Tgi che va memia spert cun in e-bike – per exempel en ina zona da 20 u 30 – po survegnir ina multa da 30 francs.
Ir cun velo sut l'influenza d'alcohol
Tgi che vegn traplà sin il velo sut l'influenza d'alcohol po da prinzi perder il permiss dad ir cun auto. Quai tenor la partiziun per mesiras administrativas da l'uffizi per il traffic dal chantun Grischun. I dependa dentant quant memia bler ch'ins ha bavì. Fin 1.6 promils na ston ins da princip betg far quitads per il permiss dad ir cun auto.
Velo ed acohol
Avrir la boxSerrar la box
fin 0.8 promils na perdan ins betg il permiss dad ir cun auto
tranter 0.8 – 1.6 promils na perdan ins era betg il permiss, ins po dentant survegnir in scumond dad ir cun velo per in mais
tar 1.6 – 2.5 promils vegn giuditgà da cas tar cas sch'i vegn prescrit in'expertisa da qualificaziun da charrar
cun sur 2.5 promils u pli bler vegn prescrit in'expertisa da qualificaziun da charrar tar l'institut per medischina forensica. A la persuna pertutgada vegn prendì davent il permiss per tut las categorias ord motivs preventivs. Er ir cun velo vegn scumandà.
