Cun la midada dal sistem da maiorz sin il sistem da proporz ha mintga partida dastgà nominar 120 persunas per ils 120 sezs dal Cussegl grond . Per il politolog grischun Clau Dermont è interessant, ch'i è sulettamain gartegià a la PPS sco ina da las pitschnas partidas en il parlament grischun, dad emplenir sia glista cumplettamain. Da l'autra vart ha la PLD, sco ina da las grondas partidas, mo pudì nominar 98 candidats e candidatas.
Sche quella quantitad da candidaturas va sin donn e cust da la qualitad da candidatura, quai sa mussia pir durant il cumbat electoral. Sin las glistas sa chattan blers numns enfin uss nunenconuschents sin il palc politic chantunal. Quels vegnan surtut ad avair la funcziun da «giugadurs e giugaduras da team» per lur partidas. Quai è in novum tar las elecziuns grischunas. En il sistem da maiorz avevan las candidatas ed ils candidats plitost cumbattì per sasezs e sasezzas.
Era tematicamain vegn il cumbat electoral a sa midar pervia dal grond dumber da candidaturas. Las partidas hajan tenor Clau Dermont da sa focussar pli fitg sin tematicas e visiuns per il chantun, enstagl da far reclama per singulas persunalitads.
