Er quest onn dovri ina chatscha speziala en il Grischun. Cun excepziun da la regiun da Vaz sut, dovri en 20 da las 21 regiuns ina chatscha supplementara sin tschiervs. Sin chavriels fa quella da basegn en 12 regiuns, communitgescha l'uffizi da chatscha grischun. La raschun per la chatscha in zic pli mala saja stada l'aura chauda e ch'i n'ha betg naivì durant la chatscha. Tuttina sajan las cifras en la rama dals onns 2018 e 2019.
Lavur pretensiusa spetga
Tut en tut ston anc vegnir sajettads 2'467 tschiervs – tants sco anc mai. Chavriels ston anc vegnir sajettads 282. Perquai che la chatscha speziala dependia adina ferm da l'aura, saja quest onn ina sfida da realisar il plan da chatscha.
Tut en tut èn 3'527 chatschaduras e chatschadurs s'annunziads per la chatscha speziala, che cumenza ils 30 d'october e cuzza fin ils 19 da december.
