Ils adversaris da la lescha da Covid-19 cumenzan il cumbat da votaziun suenter ch'els han gì rimnà bunamain 190'000 suttascripziuns per il referendum. Els averteschan che las adattaziuns en connex cun Covid sajan privlusas e surtut han els en mira il certificat. Quel dividia la Svizra. Dapi in mais èn persunas senza certificat exclusas da bleras activitads – sin basa da la regla 3G extendida. Il certificat saja perquai in instrument da discriminaziun che dividia la societad en duas classas, uschia il tenor dals adversaris da la lescha.
Sustegn da la PPS
Il zercladur aveva il referendum cunter la lescha da Covid-19 fatg naufragi . Cun 60% aveva il suveran svizzer ditg Gea a la fatschenta. Sper divers moviments da populaziun cun sceptichers da mesiras da corona survegn il referendum quella giada er sustegn da la Partida populara svizra. L'uniun Gastrosuisse ha decidì da dar liber la vusch.
Davart la lescha da Covid-19 votescha il suveran svizzer ils 28 da november. Uschia datti gia per la segunda giada ina votaziun dal pievel en connex cun la politica da corona dal Cussegl federal e parlament.