L'uschenumnà «bajetg polivalent» a Fläsch survegn il premi Norman Foster – in premi che vegn surdà da l'agentura solara Svizra. Il bajetg da l'onn 1975 ch'era avant in deposit da vin, è vegni sanà e schlargià – e producescha ussa dapli energia che quai ch'el dovra.
Entras ina buna isolaziun ed in indriz fotovoltaic che sa chatta sin il tetg producescha il bajetg ussa 275% energia, vul dir dapli che quai ch'el dovra. 65'000 uras kilowatt dovra il bajetg ad onn. 114'000 uras kilowatt èn surora e van vinavant a la clinica Gut che sa chatta gist daspera. Uschia dovra la clinica in terz pli pauc energia or da la rait.
Premi valitescha estetica e niz
Il premi Norman Foster valitescha l'estetica e cunzunt la moda e maniera co ch'ils panels solars vegnan integrads e duvrads efficientamain. Betg mo il tetg è vegnì engrondì, igl ha era dà ina nova sala communala ed in foyer. Ils architects da Cuira retschaivan il premi mardi a Genevra.