Sur Pasca 2022 han ins gia testà co i funcziuna da serrar la via tranter Panaduz e Razén per il traffic. Quest project vegn uss repetì ed optimà. Il di d'Ascensiun e sur Tschuncaisma vegnan las vias puspè serradas. In biro d'inschigner evaluescha alura la segunda runda dal project da pilot.
Concept regiunal da traffic
Per la via naziunala tras il Partenz dovria dentant in concept regiunal da traffic, che schlia il problem a lunga vista. Mesiras punctualas en singuls lieus, spostian be las colonnas e na gidian betg propi. Uschia respunda la regenza grischuna ad ina incumbensa dal deputà liberal Thomas Bigliel. Per schliar il problem a lunga vista hai gia dà inscunters tranter represchentants da l'ASTRA, da l'Uffizi da construcziun bassa dal chantun Grischun ed er cun la Polizia chantunala e represchentants da las vischnancas.
En quest connex menziunescha la regenza era ch'il chantun ha discurrì cun il concern Google. Quel vegn a sclerir tge ch'è pussaivel per infurmar ils automobilists e las automobilistas via il servetsch Google Maps. La regenza propona al Cussegl grond da surdar l'incumbensa da Bigliel.
Ord l'archiv da RTR:
Il Minisguard ha declerà co i dat insumma colonnas.
