Il Departament federal da defensiun, protecziun da la populaziun e sport, VBS, vul cuntanscher il pli tard il 2050 ina bilantscha equilibrada da CO2. Quai cun vehichels electrics, carburants ecologics, stgaudaments alternativs ed implants solars. Mardi ha la ministra da defensiun Viola Amherd preschentà il concept directiv per l'ambient da ses departament ed in emprim plan d'acziun per energia ed clima.
Grond potenzial da respargn
3'700 terajoule energia dovra il Departament federal da defensiun, protecziun da la populaziun e sport mintg'onn. Uschè bler sco la citad da Schaffusa. E cun in sbuf annual da circa 200'000 tonnas CO2 è la passida ecologica dal VBS pulit marcanta. Dumandada è qua cunzunt l'armada. Cun las casernas e plazzas d'armas, ils vehichels e chars armads sco era cun ils aviuns è ella responsabla per 98% da tut il sbuf da CO2 dal departament. Per realisar quel, quinta il VBS cun custs da radund 650 milliuns francs fin il 2030.
Plazzas da l’armada sco oasa biodiversa
Dapi il 2004 s’engascha l’armada cun il project «Natira, cuntrada ed armada» (NLA) – tranter auter sin plazzas da sajettar – per l’ambient. Ina da quellas plazzas da sajettar che duai esser ina oasa biodiversa è il plaz da l’armada a Cuira. Il plaz da sajettar Rossboden, Rheinsand e la spunda vid il pe dal Calanda porschan in funs per fluras ed animals rars, quai conferman Max Gasser e Peter Weidmann dal project NLA.
Premissas per in prà biodivers
Premissas per ch'in prà possia daventar biodivers, sajan ils suandants: Nagin guaud, il prà sto survegnir bler sulegl ed el na dastga betg vegnids duvrà intensivamain da l’agricultura. E quellas premissas sajan dadas sin l’areal dal militar, di il botanicher Max Gasser.
Damai che l’armada sajettia tranter auter sin la spunda cun muniziun traglischanta, che pudess entschaiver a brischar, vegni guardà ch’il pastg na saja betg memia aut e ch’i n'haja naginas chaglias u plantas che pudessan pigliar fieu – in paradis per fluras ed animalets.
-
Bild 1 von 7Legenda: Rheinsand e la spunda da la plazza da sajettar da l'armada a Cuira al pe dal Calanda. MAD, Max Gasser
-
Bild 2 von 7Legenda: Ina sort orchidea fitg rara. MAD, Max Gasser
-
Bild 3 von 7Legenda: Ina gilgia cotschna. MAD, Max Gasser
-
Bild 4 von 7Legenda: In salip rar sin l'areal dal militär a Cuira. MAD, Peter Weidmann
-
Bild 5 von 7Legenda: Era in salip rar ch'i dat sin l'areal dil militär. MAD, Peter Weidmann
-
Bild 6 von 7Legenda: Quella sort tschitta rara datti sin l'areal dal militär. MAD, Peter Weidmann
-
Bild 7 von 7Legenda: Era quella tschitta rara anflan ins sin l'areal. MAD, Peter Weidmann
Fieus controllads
Per part vegn era ina part dal prà brischada a moda controllada per evitar ch’el piglia fieu da sez. E quai saja in funs fitg fritgaivel che dat spazi a fluras pli flaivlas. Uschia po ina sort rara d’orchideas crescher sin quest plaz, di Max Gasser. Ed era ils animals han plaschair da las novas fluras. Uschia dettia spazi da viver per raras sorts, sco per exempel ina speziala sort da salips, di Peter Weidmann.
Malgrà ch'i dettia anc ina duas chaussas ch’ins pudess meglierar per promover la biodiversitad, sco per exempel il temp che las nursas pasculeschan en il medem lieu, sappian ins dir ch’il plaz da l’arma a Cuira è ina oasa biodiversa, dian Max Gasser e Peter Weidmann. Pertge la cumbinaziun tranter in prà senza guaud e chaglias e d’in prà che na vegn betg nizzegià intensivamain da l’agricultura saja fitg rara en Svizra.