Corsin Gadola lavura dapi l’avrigl 2004 en la partiziun tecnica da RTR. El ha cumenzà sco assistent da project per la nova chasa da medias RTR e silsuenter lavurà en divers secturs da la partiziun tecnica. Il mars 2014 è el daventà responsabel tecnologia (CTO) e dapi il 2021 è el substitut dal schef tecnica RTR. Ils ultims onns ha Corsin Gadola era participà a divers boards naziunals ed enconuscha uschia fitg bain las sfidas ed ils differents gremis da la SRG SSR.
Jau hai grond plaschair da pudair beneventar Corsin Gadola en la direcziun da RTR. Cun sia experientscha ed enconuschientscha da nossa chasa da medias pudain nus profitar d’in grond know-how ed essan uschia pronts per las sfidas tecnicas che spetgan nus ils proxims onns. A Pius Paulin vuless jau cun questa chaschun engraziar da cor per sia gronda lavur prestada durant ils ultims 34 onns. El è s’engaschà cun blera passiun ed ha furmà considerablamain il sectur ed il svilup tecnic da RTR.
La direcziun RTR sa cumpona da nov da Nicolas Pernet (directur RTR), Beat Lozza (schef servetschs centrals), Tamara Deflorin (scheffa communicaziun e marketing), Flavio Bundi (schefredactur) e Corsin Gadola (schef tecnica).