2010
Il Minisguard: in magazin d'infurmaziun per uffants
Dapli
Minisguard sa numna la nova emissiun da televisiun dad RTR per uffants. Mintga sonda a las 17.40, e scorepetiziun la dumengia a las 17.15, survegnan ils uffants ina survista da quai ch'è succedì en lur regiun, en il chantun, en Svizra ed er a l'exteriur. Las redacturas ed ils redacturs elavuran temas relevants da politica, cultura e sport uschè ch'uffants da la scola primara pon suandar. Minisguard remplazza l'istorgina da buna notg (davosa emissiun 27-12-2009) ch'è stada durant plirs decennis e per pliras generaziuns in punct fix la dumengia saira.
Accents – ina gasetta da chasa per RTR
Il cumenzament da mars è cumparida l'emprima ediziun da la gasetta da chasa RTR e da la societad purtadra SRG.R cun il titel Accents. Accents duai far punt tar collavuraturas e collavuraturs da RTR e punt tar persunas-clav da la societad civila rumantscha e tar persunas attaschadas a RTR. La gasetta cumpara quatter giadas ad onn.
Las-Alps-infoteca – La chasa da medias da las Alps
Dapli
RTR lantscha ils 27 d'avrigl in project cun il titel Las-Alps-infoteca. La finamira è d'installar a Cuira in center da cumpetenza per ils meds da massa da las Alps. Las-Alps-infoteca elavura temas che fatschentan la glieud en l'entira regiun da las Alps. I vegn creà ina rait da collavuraturAs da medias e dad experts che porschan quests temas al public. Las-Alps-infoteca duai daventar la Chasa da medias da las Alps.
2009
Mariano Tschuor daventa nov directur
A partir dal matg 2009 è la direcziun da Radio e Televisiun Rumantscha RTR en ils mauns da Mariano Tschuor. El è il quart directur en l'istorgia da RTR. A l'entschatta da ses uffizi ha el envidà ses antecessurs en la chasa da medias RTR: Clemens Pally (directur RTR 1969 fin 1984), Chasper Stupan (directur RTR 1984 fin 2001) e Bernard Cathomas (directur RTR 2001 fin matg 2009).
RTR ha tschertgà LA CHANZUN RUMANTSCHA
L'october ha RTR preschentà ina nova seria d'emissiuns cun il titel «La chanzun rumantscha». Il project interactiv è vegnì lantschà en il Radio Rumantsch, accumpagnà sin www.rtr.ch (guarda link giusut) e cumplettà cun il final en la televisiun. En set emissiuns da radio en successiun ha il public elegì da passa 90 chanzuns rumantschas las 10 ch'èn vegnidas en dumonda sco «La chanzun rumantscha». Il grond final è vegnì emess ils 5 da december a partir da las 20.40 sin il chanal da televisiun RSI LA 1, directamain da Lugano.
Nov decor per las emissiuns da la TvR
La Televisiun Rumantscha ha ses emprim agen decor en sia istorgia. Dapi il cumenzament da november 2009 sa preschenta la Televisiun Rumantscha TvR cun ina nova decoraziun e novs signets. La parita nova è vegnida creada en stretga collavuraziun cun la partiziun da concepziun da la televisiun svizra SF.
2006
Dapi ils 15 da matg 2006 emettan Radio e Televisiun Rumantscha ord la nova chasa RTR a la Plazza dal teater a Cuira. En quest center da medias modern sa chattan era ils biros dals correspundents da la Televisiun svizra SF e da Radio DRS, da la Radiotelevisione svizzera di lingua italiana RTSI, ultra da quai era la filiala da l'Agentura svizra da novitads SDA ed il post central da l'Agentura da Novitads Rumantscha ANR. Ils 6 da zercladur è la chasa vegnida averta uffizialmain ed ils 9 e 10 da zercladur èn stads ils dis da las portas avertas. La nova chasa RTR è la quarta dimora da Radio e Televisiun Rumantscha a Cuira.