1988
Il matg 1988 vegn il program rumantsch da radio augmentà da 4 a ca. 5 1/2 uras per di. L'augment cumpiglia oravant tut amplificaziuns dal program existent: l'emissiun «Diari» vegn schlargiada, il «Battaporta» obtegna in auter concept e dapli temp. Questas amplificaziuns vegnan realisadas senza credit e persunal supplementar.
Davent da quest onn producescha la Televisiun Rumantscha il Telesguard cumplettamain a Cuira. L'infrastructura ed il persunal per la tecnica metta la firma privata Videcom a disposiziun. L'emissiun na vegn betg pli filmada, mabain registrada cun video. La midada da sistem e dal lieu da producziun pussibilitescha da resguardar meglier l'actualitad che cura ch'il Telesguard vegniva montà a Turitg.
1987
L’emprim d'avrigl vegn schlargià danovamain il program rumantsch da 2 1/2 uras a 4 uras per di. L'infurmaziun vegn resguardada dapli en il program. Nov en il program è l'«Artg», in'emissiun da 75 minutas la sonda da mezdi. En connex cun la purschida d'infurmaziun pli vasta èn vegnids stgaffids posts da correspundent en plazza cumplaina en Engiadina (Samedan) ed en Surselva (Mustér). En il Grischun central (Savognin) è vegnì engaschà in correspundent a temp parzial per survegnir dapli infurmaziuns era da quella regiun. Ils 26 da favrer emetta la Televisiun Rumantscha l'emissiun Direct da..., in'emissiun d'infurmaziun e divertiment da nossas vischnancas.
1985
Il temp d'emissiun dal Telesguard vegn augmentà da 10 a 15 minutas. Quai munta ina plazza da lavur supplementara per la Televisiun Rumantscha.
1984
La fin da mars va Clemens Pally, il manader dal post da programs, en pensiun. Il prim d'avrigl 1984 surpiglia Chasper Stupan la direcziun dal studio regiunal rumantsch. Quest onn vegn era introducida la quarta chadaina d'emetturs d'undas ultra curtas (UKW) en il Grischun per derasar las emissiuns rumantschas.
Schlargiament da las emissiuns rumantschas da 40 minutas a 2 1/2 uras per di. Nov è in program d'accumpagnament per ils auditurs rumantschs, numnadamain l'«Allegra» da glindesdi fin venderdi da las 10.00 a las 12.00 ed il «Diari» da las 17.00 a las 17.30. Novas èn era l'emissiun per ils giuvens, il «Battaporta», dal mardi da las 21.00 a las 22.00 e l'emissiun d'infurmaziun «Accents», derasada la sonda da las 19.00 a las 19.30. Ils 2 da favrer vegn emess il Dai, Dai, Dai, il gieu tranter duas uniuns da differents lieus, per l'emprima giada.
1980
Ils 5 da schaner vegn emess l'emprim Telesguard. Quest'emissiun emnila d'infurmaziun da diesch minutas remplazza la cronica dal Balcun Tort e garantescha dapli actualitad. Il magazin da la dumengia na sa numna betg pli Balcun Tort, mabain Svizra Rumantscha. Il schlargiament dal program pretenda in augment dal persunal: sis persunas lavuran cumplain ed in pèr en plazza parziala tar la Televisiun Rumantscha. A partir dal 1980 emetta la Televisiun Rumantscha quatter giadas l'onn Il pled sin via, in'emissiun da caracter religius cun suttitels tudestgs.