1969
In element constant dal Balcun Tort è il Mosaic Grischun (1966-1969), davent da l’onn 1969 la Cronica Grischuna cun actualitads da nossas regiuns. Il Balcun Tort vegn emess mintga sis emnas, mintgamai durant var in'ura. Fin a la fin da 1971 è quai mintgamai 8 fin 9 emissiuns l'onn. Quellas vegnan planisadas da Tista Murk e realisadas da Willi Walther.
Tista Murk banduna il post da program a Cuira. Ils 11 d'october 1969 surpiglia dr. Clemens Pally il post da manader dal Radio e da la Televisiun Rumantscha.
1969 l'emprima emissiun da Telescola. 1970 suondan anc trais e 1971 quatter Telescolas.
1967
Inauguraziun dal post da program «Canorta Radio Rumantsch» a Cuira. Las contribuziuns rumantschas vegnan preparadas a Cuira e vegnan emessas directamain da Cuira en il segund program da radio DRS. Per far las emprimas emissiuns rumantschas stattan a disposiziun CHF 144'302.50.
1965
Augment da las emissiuns dal Balcun Tort da duas a sis l'onn.
1963
L'emprima contribuziun da la Televisiun Rumantscha cun il titel «Il Balcun Tort» vegn emessa ils 17 da favrer per commemorar l'anniversari da 25 onns rumantsch sco quart linguatg naziunal svizzer, ina segunda emissiun vegn emessa ils 30 da zercladur. Quellas emissiuns èn vegnidas intermediadas da Tista Murk.
