1959
Sco prim tgirader da program en uffizi cumplain e cun domicil e plazza da lavur en il chantun Grischun vegn Tista Murk, da lezzas uras president da la CRR, engaschà. Ils 9 d'october datti l'emprima emissiun «Viagiond cul microfon» da Tista Murk, in'emissiun d'infurmaziun d'ina mes'ura l'emna.
1955
L’emprima contribuziun da «Radioscola» cun il titel «Las cristallas» da pader Flurin Maissen vegn emessa ils 27 da schaner. Il medem onn suonda anc ina segunda emissiun da Jon Vonmoos: «Las funtanas mineralas da Scuol e Tarasp». Quest onn èn tranter auter era vegnids emess dus gieus auditivs: «L'ura da Frederic il Grand» da Men Rauch e «Ramora» da Leza Uffer.
1954
La societad purtadra CRR (Cuminanza rumantscha radio e televisiun) vegn recepida en la SSR. En l'emprim rapport annual 1953/54 vegnan menziunadas las suandantas emissiuns: emissiuns da las nov, uras d'uffants, pregias e cronicas rumantschas in lingua tudestga.
1943
Entschatta da las emissiuns rumantschas regularas. Quellas vegnan emessas adina l'emprim venderdi dal mais. Tgiradas vegnan ellas da dr. Adolf Ribi.
1940
Entschatta da la cronica rumantscha, in'emissiun davart la vita e la lavur dals Rumantschs, per ils auditurs da linguatg tudestg.
1938
Ils 20 da favrer renconuscha la populaziun svizra il rumantsch sco linguatg naziunal cun 574'991 cunter 52'827 vuschs. En quest connex vegnan emessasdiversas emissiuns.
1935
L’onn 1935 vegn emessa l'emprima pregia rumantscha.
1927
L’onn 1927 vegn deditgà in entir program da la saira a «l'Uniun rumantscha da Turitg». L'entir arranschament vegn transmess per rumantsch.
1924
En la Gasetta Romontscha dals 11-9-1924 vegn annunziada da raschun l’emprima emissiun da radio en lingua rumantscha: La staziun de radio a Turitg dad oz, ils 11 d. q. ina sera taliana e romontscha. Per romontsch plaida sgr. Felix Huonder: Allas 8.35 d. s. tegn el in plaid romontsch. Allas 9.30 porta el avon la poesia «Al pievel romontsch» da nies poet nazional G. Hasper Muoth. – Ses plaids vegnan a sgular tschiens kilometers lunsch.