Di tematic naziunal «Co vai, Svizra?»
La stad 2023 ha la SRG SSR lantschà il project da pilot «dialog», ina purschida digitala per tut las quatter regiuns linguisticas e per Svizras e Svizzers che vivan a l'exteriur. Il project è vegnì inizià ils 23 d'avust 2023 cun in di tematic naziunal. En il rom d'ina emissiun en directa e cun colliaziuns live en las autras regiuns linguisticas èn vegnids preschentads ils resultats d'ina retschertga d'opiniuns naziunala fatga per incumbensa da la SRG SSR. Ils custs per il di tematic naziunal han muntà a 579'000 francs.
«Todesfalle Haute Route – die Rekonstruktion eines Dramas»: in film documentar davart ina tura cun skis mortala tras las Alps
Ils 29 d'avrigl 2018 èn sa disgraziads mortalmain set skiunz:as sin ina tura cun skis tranter Chamonix e Zermatt. Las persunas èn mortas dal fraid durant ina burasca da naiv. L'autur da films Frank Senn ha reconstruì l'accident tragic ed ha discurrì cun las persunas che han survivì la disgrazia. Custà ha il film documentar emess en la televisiun e disponibel sin ils players e sin la plattafurma da streaming da la SRG SSR PlaySuisse 445'000 francs.
Docuseria «The Pressure Game – Im Herzen der Schweizer Nati»
La docuseria da sis parts ha dà in'invista exclusiva en la vita dals ballapedists da l'equipa naziunala svizra. La seria da Simon Helbling è vegnida transmessa durant il meglier temp d'emissiun en tut las regiuns dal pajais e stat a disposiziun sin PlaySuisse, la plattafurma da streaming da la SRG SSR, e sin ils players regiunals. Ils custs totals per la producziun, fatga er a l'exteriur, han importà 1,3 milliuns francs.
«Chantez-vous Suisse?»: la sfida musicala sin il Gottard
Per il format radiofonic naziunal «DieAnderen – Lesautres – Gli altri – Ils auters» èn sa scuntrads il zercladur 2023 tschintg musicist:as da tut las regiuns linguisticas da la Svizra sin il Pass dal Son Gottard. En il rom dal project «Chantez-vous Suisse?» han els interpretà communablamain chanzuns da tut las parts dal pajais. Ils custs per la producziun han muntà a 109’000 francs.
Festa federala da la musica populara: costums, sauts e tradiziuns a Bellinzona
Dals 21 fin ils 24 da settember 2023 ha gì lieu a Bellinzona la Festa federala da la musica populara. RSI, RTR, RTS e SRF han accumpagnà l'occurrenza en il radio, la televisiun ed online. Il punct culminant è stà la producziun da televisiun «Bella Musica». Il project naziunal ha custà 494'000 francs.
«Die Rezepte unseres Lebens»: in barat culinaric sur ils cunfins linguistics
L'onn 2023 han RSI, RTR, RTS e SRF realisà ensemen ina concurrenza da cuschinar. Sis secondas e secondos dals pli gronds pajais d'immigraziun – Portugal, Italia, Spagna, Germania, Cosovo e Frantscha – ed ina «Svizra stgetta» han cuschinà ina per l'auter e valità vicendaivlamain lur prestaziuns. La seria televisiva ha custà en total 806'000 francs.