Il rumantsch, la quarta lingua naziunala da la Svizra, è perfin per intginas Grischunas ed intgins Grischuns mintgatant in misteri ed ina sfida en il mintgadi. Sco chasa da medias per la Svizra rumantscha s'engascha RTR per la promoziun da la lingua e per l'intermediaziun da la cultura indigena – e va perquai adina puspè novas vias. Dapi il cumenzament da quest onn circuleschan duas gondlas da RTR en ils territoris da skis da Savognin e da Scuol. Ellas sumeglian endadens in pau ad in studio da radio da RTR e mainan ils giasts dal sport d'enviern cun divers audios e videos en il mund da la lingua e cultura rumantscha.
Rumantsch per la pista
Durant il viadi curt emprendan ils giasts cun agid da las protagonistas e dals protagonists simpatics – ed ils suttitels correspundents – las pli impurtantas construcziuns rumantschas per in bellischem di en la naiv. «La realisaziun è fitg interessanta e divertenta. Jau hai mirveglias, sch'il curs da lingua en la gondla mussa l'effect spetgà ed ils giasts empostan en avegnir lur gervosa en la ‹Marmotta› per rumantsch», surri Arno Cadonau, il manader dal servetsch tecnic da las pendicularas da Scuol.
Ma era senza interacziun directa profiteschan ils giasts da la cultura rumantscha. Lura è numnadamain d'udir l'emettur da radio da RTR sur ils autpledaders en las gondlas. Dasper novitads ed emissiuns da profundaziun garantescha er il program da musica cun artistas ed artists da la scena rumantscha in'invista en la quarta lingua naziunala. Per Nicolas Pernet, il directur da RTR, èsi cler: «Il service public è en il cas da RTR era la sensibilisaziun per la cultura e la lingua rumantscha sur ils cunfins linguistics ora. Cun las gondlas da RTR purtain nus questa debatta cun in surrir en il spazi public e procurain uschia segiramain per material da discussiun divertent sin la pista e cun baiver in vin chaud».
Inauguraziun da la gondla tar las pendicularas a Scuol
-
Bild 1 von 6. La gondla sin viadi. Bildquelle: RTR.
-
Bild 2 von 6. Emprender rumantsch durant il viadi da la gondla. Bildquelle: RTR.
-
Bild 3 von 6. Però era senza interacziun profiteschan ils giasts cun tadlar Radio Rumantsch. Bildquelle: RTR.
-
Bild 4 von 6. Da san.: Il directur da RTR Nicolas Pernet, il manader dal servetsch tecnic da las pendicularas da Scuol Arno Cadonau, il rappunz Gino Clavuot aka Snook ed il directur da las pendicularas Andri Poo tar l'inauguraziun da la gondla rumantscha. Bildquelle: RTR.
-
Bild 5 von 6. Ins po interagir cun protagonists e protagonistas – ed i dat era suttitels – per emprender las pli impurtantas construcziuns rumantschas per in bellischim di. Bildquelle: RTR.
-
Bild 6 von 6. Nicolas Pernet: «Il service public è en il cas da RTR era la sensibilisaziun per la cultura e la lingua rumantscha sur ils cunfins linguistics ora.». Bildquelle: RTR.
Blera tecnica en in spazi pitschen
Ina sfida speziala durant la realisaziun da las gondlas da RTR è stada la tecnica – quai tant pervi dal spazi limità sco era pervi da l'access limità a forza electrica. Per procurar per l'electricitad supplementara han ins perquai montà panels solars. «Da planisar ina gondla cun blers detagls e blera tecnica è bain stà cumplitgà, ma er interessant. Uss ans legrain nus fitg da parter questa purschida cun noss giasts», accentuescha Christoph Passecker, directur commerzial da las pendicularas da Savognin.
Inauguraziun da la gondla tar las pendicularas a Scuol
-
Bild 1 von 3. Inauguraziun da la gonda è stada ils 19-01-2024 a Savognin. Daniel Wasescha, Luana Tscharner, Curdin Baltermia, Christoph Passecker e Nicolas Pernet durant l'inauguraziun da la gondla a Savognin. Bildquelle: RTR.
-
Bild 2 von 3. La gondla da RTR penda a Savognin. A Savognin è la gondla da RTR pronta per ils giasts. Bildquelle: RTR.
-
Bild 3 von 3. La gondla da RTR fa ses viadi en il territori da skis a Savognin. Bildquelle: RTR.