Il toc da teater rumantsch: «Üna sbrinzla – üna grotesca otalpina» che vegn preschentà per l’emprima giada al Festival da teater Travers a Zuoz, è naschì or da la plima da l’autura da Zernez, Selma Mahlknecht. Ella è vegnida undrada cun l’emprim premi travers Zuoz che la Lia Rumantscha e la vischnanca da Zuoz han surdà.
«S-chüs-cherin»
Il scenari da l’istorgia or da la plima da Selma Mahlknecht è en sasez enconuschenta e regorda en quest cas in pau vi da la vischnanca da Susch u era S-chanf. Quai era pervi dal «S-chüs-cherin» che vegn discurrì en il vitg S-chüs-ch. Ultra da quai discurran las tschintg acturas ed acturs professiunals sin il palc er il «s-chüs-cherin».
-
Bild 1 von 14. Effects da glisch, musica, ramurs suttastritgan l'istorgia inscenada sut la batgetta da René Schnoz. Bildquelle: RTR.
-
Bild 2 von 14. Las tschintg acturas ed acturs en acziun sin il palc en il Globe a Zuoz. Bildquelle: RTR.
-
Bild 3 von 14. Las preparativas per la visita da l'investur. Bildquelle: RTR.
-
Bild 4 von 14. L'agenta da l'investur anonim sa lascha maldisar cun ina massascha. Bildquelle: RTR.
-
Bild 5 von 14. Il pur Carrari vesa nair per l'avegnir da ses vitg S-chüs-ch. Bildquelle: RTR.
-
Bild 6 von 14. Tut quai che glischa n'è betg adina aur. Bildquelle: RTR.
-
Bild 7 von 14. La presidenta communala Cajemmi survegn sustegn da l'impressari Caschnoz. Bildquelle: RTR.
-
Bild 8 von 14. Il pur Carrari sa dosta encunter ils plans da l'investider. Bildquelle: RTR.
-
Bild 9 von 14. Grazia a surtitels è l'istorgia era chapibla per persunas che na discurran betg rumantsch. Bildquelle: RTR.
-
Bild 10 von 14. Tgi sa sche l'istorgia piglia ina buna fin per ils da S-chüs-ch ? Bildquelle: RTR.
-
Bild 11 von 14. René Schnoz ha ina rolla dubla sco reschissur ed il medem mument sco actur en la rolla da l'impressari Caschnoz. Bildquelle: RTR.
-
Bild 12 von 14. Jonathan Ferrari durant sa schmincar. El è il pli giuven da la truppa. Bildquelle: RTR.
-
Bild 13 von 14. Felicitas Heyerick ha gì d'emprender rumantsch per sia rolla. Bildquelle: RTR.
-
Bild 14 von 14. L'actura engiadinaisa Annina Sedlacek curt avant ch'i va liber. Bildquelle: RTR.
Il grond salvader?
Ina vischnanca muntagnarda idillica, che cumbatta encunter la depopulaziun e l’impovriment. Tut sa lamenta, ma nagin fa insatge encunter. Quai sa mida cura ch’in investider annunzia tras sia agenta (Felicitas Heyerick) da vulair transfurmar il vitg en in paradis da vacanzas.
Grondas speranzas ed opposiziun
Sco spetgà datti dad ina vart persunas ch’èn be fieu e flomma per ils plans da l’investider, auters cumbattan cun tuttas forzas els. La presidenta communala Cajemmi (Marietta Jemmi) e l’impressari Caschnoz (René Schnoz) che vesan ils raps, la lavur e novas plazzas da lavur dad ina vart. Da l’autra il pur Cararri (Jonathan Ferrari) ch’è da principi sceptic e vesa er ils dischavantatgs u la dunna naiva Cadlacek (Annina Sedlacek) che sa lascha influenzar da tut las varts.
Pitschen palc, soluziuns innovativas
L’istorgia vegn inscenada sut la reschia da René Schnoz, da las acturas ed acturs professiunals en il Globe a Zuoz. La plazza sin il palc è limitada, uschia ch’i vegn tratg a niz blers effects da glisch, musica u era simpels requisits che pon vegnir transmidads giugond.
Il Festival da teater Travers ha lieu l’emprima giada dals 6 fin 8 d’october 2023 a Zuoz. La premiera dal toc da teater è il venderdi saira a las 20:00.