Per questa acziun han ins aposta construì ina cella là, nua che Wiborada era mirada en. L'acziun fa part dal project ecumenic «Wiborada 2021», che ha lieu dals 23 d’avrigl enfin ils 3 da fanadur a Son Gagl. Cun quel project less ins render attent a quella dunna, ch’ha vivì durant il dieschavel tschientaner e ch’era ordvart impurtanta per la citad da Son Gagl.
Gist perquai ch’ella aveva sa laschà mirar en e viveva sco inclusa, era la sontga Wiborada in uman da la libertad. Ella aveva sa deliberà da tut las normas da la societad, per exempel quellas che prescrivevan, sco ch’ina dunna ha da viver en il temp medieval.
-
Bild 1 von 5Legenda: Ina statua da la sontga Wiborada Wiborada 2021 -
Bild 2 von 5Legenda: La baselgia St. Mangen a Son Gagl cun la cella da «Wiborada 2021». Wiborada 2021
-
Bild 3 von 5Legenda: La cella da "Wiborada 2021" Wiborada 2021
-
Bild 4 von 5Legenda: Il dadens da la cella Wiborada 2021
-
Bild 5 von 5Legenda: Ina da las exposiziuns dal project "Wiborada 2021" Wiborada 2021
Wiborada aveva decidì da sa laschar mirar en en ina cella sper la baselgia da St. Mangen a Son Gagl. La ha ella vivì sco inclusa ed ha sa deditgà a la spiritualitad e la religiun. Sia cella aveva nagina porta, dentant duas pitschnas fanestras. Cun guardar tras ina pudeva ella far part a servetschs divins. Tras l’autra, quella cunter anora, cussegliava Wiborada la glieud en dumondas da la vita e la religiun. Era auts dignitaris politics e spirituals tadlavan sin ses cussegl.
Ch’era umens, e cunzunt auts dignitaris spirituals e politics, tadlavan sin il cussegl d’ina dunna, è remartgabel.
Wiborada aveva previs in’attatga dals Ungarais. Sin basa da sia recumandaziun avevan ins evacuà l’entira citad da Son Gagl anc avant l’attatga. Wiborada sezza era restada en sia cella ed era vegnida mazzada dals Ungarais l’onn 926. La martira è vegnida declerada sontga da Papa Clemens l’onn 1047. E quai sco emprima dunna insumma.
L’inizianta Hildegard Aepli declera l'impurtanza da la sontga Wiborada en Vita e cretta. Ed ella raquinta da sia atgn'emna sco inclusa en la cella.