Seewis – Partenz – l’onn 1622: En la vallada èn millis da mercenaris. Ils strategs da Habsburg lessan conquistar il Partenz ed emprovan gist er anc da conquistar las olmas refurmadas, tramettend il frar chaputschin Fidelis a missiunar.
Ina dumengia d'avrigl anno 1622
Dentant – gia sia emprima pregia a Seewis è sia ultima. Fidelis da Sigmaringen, guardian da la claustra da chaputschins a Feldkirch, vegn assassinà gist sut la baselgia. El aveva anc empruvà da fugir. Ma er la schuldada che l'accumpagnava per sia segirtad, n'ha betg pudì salvar el. Ils dal Partenz hajan mazzà er els.
Là, nua ch'el duai esser vegnì per la vita, regorda oz in bigl cun la funtauna a Son Fidelis. Tras sia mort da martir è el vegnì canonisà il 1729 sco emprim chaputschin insumma. Sper sia legenda è er restà ina reliquia dad el: Il chau da Son Fidelis sa chatta anc oz en la Claustra da chaputschins en la citad austriaca Feldkirch.
Son Fidelis en maletgs
-
Bild 1 von 8Legenda: Sin questa senda era mitschà Son Fidelis: Senza success – el è vegnì assassinà ils 24 d’avrigl 1622 sut la baselgia da Seewis. RTR, Isabelle Jaeger -
Bild 2 von 8Legenda: Il chaputschin Son Fidelis: Sco Fidelis da Sigmaringen aveva el vulì salvar las olmas dals dal Partenz. RTR, Isabelle Jaeger
-
Bild 3 von 8Legenda: La funtauna da Son Fidelis: Ella regorda anc oz al lieu, nua che Fidelis duai esser vegnì assassinà. RTR, Isabelle Jaeger
-
Bild 4 von 8Legenda: Commemorar, betg far festa: Il teolog ed istoricher Johannes Flury è s’engaschà per las occurrenzas commemorativas. RTR, Isabelle Jaeger
-
Bild 5 von 8Legenda: 400 onns Fidelis: Per Seewis er ina pussibilità da carmalar ina u l’auter visitader en il vitg. RTR, Isabelle Jaeger
-
Bild 6 von 8Legenda: Exclusivitad istorica: En il vitg da Seewis datti er in monument per ils umens dal Partenz che han defendì la patria cunter ils Habsburgais – ed uschia per ils assassins da Fidelis. RTR, Isabelle Jaeger
-
Bild 7 von 8Legenda: Sa tanscher il maun sur cunfin: Las occurrenzas han er lieu a Feldkirch e Sigmaringen. RTR, Isabelle Jaeger
-
Bild 8 von 8Legenda: Dapli tar il tema: Quai è da chattar sin la pagina en la rait da Seewis. RTR, Isabelle Jaeger
Valladas grischunas ed austriacas en flommas
Il murdraretsch da Fidelis è capità en il temp da la guerra da 30 onns. Lura eran er las valladas grischunas en flommas. Ils fatgs da quella giada han laschà lur fastizs en la memoria da generaziuns – tant en il Grischun sco er en l'Austria. Perquai saja nairas uras da sa regurdar da Son Fidelis e da quels temps burascus. Quai betg faschond festa, ma sa tanschend il maun e commemorond.
L'onn da e per il Son Fidelis
Ils da Seewis fan quai cun differentas occurrenzas: da la tura scenica tras il vitg fin ad in'exposiziun istorica, ed ina messa da reconciliaziun cun visitas da Feldkirch e Sigmaringen.
Tar la commemoraziun da questa stad ha er il teolog ed istoricher Johannes Flury, oriund da Seewis, gì pled en chapitel. Cun el ha la Vita e cretta fatg ina visita al lieu, nua che la vita terrestra dal chaputschin Fidelis da Sigmaringen ha prendì ina fin andetga.