Mintgin da nus chapescha insatge auter sut natira. Natira po esser quai ch'ins vesa en il liber. Ma natira è er il carstgaun sez. E sche nus carstgauns midain la natira, midain nus er nus sez, di l’eticher Dirk Lanzerath en Vita e cretta. Mintga furma da destrucziun da la natira pericliteschia la solidaritad.
La natira tutga a nagin, nagin posseda ella. La natira tutga a sasezza.
Il carstgaun dastgia esser part da la natira, e quai er be in tschert temp. Possess da natira ni da terren saja be ina relaziun da possess a temp che sa midia adina puspè.
Nus stuain far diever da la natira per surviver. Ma nus duessan er respectar ella.
Nus essan tuts part da la societad che profitescha e metta il medem mument en privel la natira. Ma ils davos 150 onns è noss'influenza s’augmentà considerablamain. Tschientaners avain nus vesì la natira be sco object che nus pudain midar e na betg pli sco insatge agen. La situaziun actuala da la midada dal clima e da la sperdita da la biodiversitad duess mussar a nus che quai era la fallada via.
Mintga decisiun individuala ha influenza sin la societad. Perquai duess er il collectiv decider co ir enturn cun la natira.
Dirk Lanzerath spera, che persunas, vischnancas, stadis, continents che tractan la natira bain possian esser in bun exempel per auters.
La natira n’è betg gratuita. La valita da la natira è dapli che be la valita monetara.
Ma malgrà ch’i va cun la natira uschè mal – midada dal clima, sperdita da la biodiversitad, polluziun e destrucziun da l’ambient – na duessan nus betg dar si la speranza, di Dirk Lanzerath.
