La situaziun en il mund para tendida sco da rar avant – cun crisas economicas, catastrofas da clima, guerras e malsegirezzas socialas. Tuttina vali da guardar cun speranza en il onn nov, di la reverenda Marianne Strub da la Corporaziun evangelica Ardez-Ftan-Guarda.
La Vita e cretta discurra cun ella da la forza. La forza da la cuminanza e da la natira, la forza da la devisa biblica 2025 che cusseglia «Examinai tut e retegnai il bun!» – ma er da la forza da la speranza che perfin ils liuns da quest mund savessan magliar puspè strom sco il liun biblic pro Jesaja.
Il maletg ferm dal liun che maglia strom dovra il profet Esaja en il vegl testament per descriver las cundiziuns paradisicas en in’era futura messianica.
Empermischun dad in nov tschel e dad ina nova terra
17 Pertge guarda, jau stgaffesch in nov tschel ed ina nova terra;
25 Luf ed agnè vegnan a pascular ensemen ed il liun vegn a magliar strom sco il bov; ma pulvra è il paun da la serp. Nagut dal mal e nagut ruinus na vegn as vegnir fatg sin tut mes sontg munt, di il Segner.
Cun radund 130 menziuns è il liun in dals animals ils pli frequents en il vegl testament. El cumpara sco grond animal da rapina che fa fastidi als pasturs e lur scossas, dentant er sco l’erox admirà tranter ils animals.
Sche quest animal stà sper il bov e na maglia betg a quel ma tut simpel e vegetaric strom, sche lura eran cuntanschids per il profet Esaya propi temps da pasch per tuts.
