A Brinzauls stat la vita salda. La vischnanca è evacuada. La glieud e la muaglia ha chattà suttetg utrò. Da lur destin è vegnì rapportà dalunsch sur ils cunfins grischuns e perfin svizzers or. En questa situaziun vul er la baselgia porscher maun.
«Il Rutsch fa tremblar la speranza»
In ch'è sez en contact direct cun ils da Brinzauls è il spiritual catolic Don Federico Pelicon. El ha emprendì ad enconuscher la glieud che stat qua sco persunas ch’èn superbias da lur vischnanca sin la terrassa sulegliva. Da ses punct da vista haja la glieud fatg «amicizia cun il Rutsch». Uss sa chattian els dentant betg en ina situaziun ventiraivla:
Cun la segunda evacuaziun ha la glieud da Brinzauls in sentiment da frustraziun e d'impussanza. L'amicabel Rutsch smanatscha e la speranza trembla. Ma la speranza na dattan ils da Brinzauls betg anc si.
L’advent sco temp intensiv, dentant betg be negativ
Er sch’il temp d’advent saja uss in temp marcant da l’atmosfera e dal sentiment nostalgic per persunas ch’hajan gia bandunà nus, na saja l’advent betg be grev, raquinta Don Federico.
Il temp d’advent è il medem mument marcà da la speranza da nova renaschientscha –cun la speranza interna che tut vegn bun per tuts e tuttas.
Per la Baselgia saja uss impurtant da procurar che la glieud na sa chattia betg suletta, mabain en cuminanza:
La vischnanca da Brinzauls tutga tar nossa Val Alvra, e la Val Alvra tutga tar Brinzauls. E nus essan ina cuminanza. Ed en questa cuminanza è la sfida per la Baselgia d'anc scuvrir la glisch tranter la glieud, la glisch dal spiert, la glisch da la speranza.
Don Federico enconuscha las forzas da la natira
Il spiritual deriva da la regiun taliana dal Friul. Sco mattet dad otg onns haja Federico Pelicon fatg tras il terratrembel. 1’000 persunas hajan pers lur vita en 58 secundas e bleras sajan mortas anc emnas pli tard da lur feridas. Cun sia famiglia haja el stuì viver per in onn en tendas.
Cun quai che nagin n'haja pers a Brinzauls sia vita tras il Rutsch, possia el dir da la natira:
La natira ans fa attent che nus n’essan betg ils signurs, mabain mo ses pertgiraders. E nus stuain viver cun respect envers la natira e la creaziun. Tals eveniments pon rinforzar tai, dentant er prender la fidanza.
La fin finala, concluda Don Federico, haja mintgina e mintgin da decider sez, vi da tgi e vi da tge ch’ella u el veglia crair. El saja restà persvadì che la vita vegn rinforzada tras la fidanza e la charezza, uschia sco quai che nus vegnin rinforzads tras la cretta per surventscher eveniments negativs.
Tant la Baselgia catolica sco er la Baselgia evangelic-refurmada vulan porscher maun per ils da Brinzauls.
Sustegn er per refurmadas e refurmads en la diaspora da Brinzauls
Per las 21 persunas refurmadas da Brinzauls s’engascha er sia plaiv, raquinta Andri Poo, president da la plaiv evangelic-refurmada Val d’Alvra. Er per rinforzar il contact cun la diaspora refurmada en la vischnanca primarmain catolica da Brinzauls haja la radunanza da la plaiv elegì l’emna passada ina suprastanta nova dad Alvagni.
En ina charta accumpagnada dad in pachet d’advent ha il reverenda Thomas Widmer da Schmitten che tgira actualmain er ils da Brinzauls, signalisà il sustegn da la Baselgia.
En patratgs essan nus stads tar Vus, cura che Vus avais stuì bandunar Voss bel vitg la dumengia, ils 17 da november gia per la segunda giada. Era nus deplorain che Vus avais da passentar ils proxims mais en in dachasa transitoric, en l'intschertezza tge ch'i vegn a capitar cun Vus.
I saja impurtant da sustegnair uss la tgira da l’olma, punctuescha Andri Poo. Il president da la plaiv sa mussa dentant er pront da porscher maun e sustegn tar autras dumondas ch’i vegn a dar.
L'altar è vegnì salvà la segunda giada
-
Bild 1 von 2Legenda: L'altar prezius da la gotica tardiva è vegnì salvà per la segunda giada ord la baslegia da Brinzauls. FMR
-
Bild 2 von 2Legenda: Questa giada è l'altra vegnì pachettà en 100 stgatlas e transportà en in lieu secret. FMR