Il renumà giuven rockadur engiadinais Dario Widmer embratscha la scena indigena cun sia chanzun «Algordanzas».
Dario Widmer
Era sch’el ha strusch 25 onns pon’ins considerar Dario Widmer sco ina «veglia lieur» dal rock rumantsch. Sut ses surnum d’art «Spinfire» ha il giuven engiadinais publitgà gia dus albums ch’han gì grond resun er ordvart la Rumantschia. Cun la gruppa dal medem num ha el absolvì ils ultims trais onns passa 100 concerts per tut la Svizra enturn, e sia chanzun «Sentimaints» dal 2010 ha gì ina bella rotaziun sin las undas da l’anteriur radio DRS 3.
Sia participaziun al Top Pop vala dentant sco ina embratschada da la scena indigena, ina scena ch’al stat ferm a cor e ch’al ha adina puspè inspirà. La lingua rumantscha saja per el il meglier med per exprimer sentiments, da l’allegria enfin la tristezza, di il musicist ch’è creschì si a Zernez ed abitescha oz a Scuol.
A questa lingua ed a sia patria deditgescha Dario Widmer ses Top Pop «Algordanzas», ina pitschna skizza da return, che culminescha en in chor imnic, mega-radiofonic, tegnì en la tempra «indie». In chor ch’annunzia quasi er il novischem album dal premurà rockadur, registrà cun sia nova band. Quest terz album «#followme» duai cumparair las proximas emnas.
Realisaziun
Dapli
Musica, chant e text: Dario Widmer
Producziun: Manfred Zazzi
Bass: Winnie Bucher
Ghitarra: Joe Schwach
Drums: Pädu Ziswiler
Text da la chanzun: Algordanzas
Vegn sü da Turich
In ma patria,
Ingio chi’s discuorra rumantsch.
La via ans maina insembel
Sün quel munt
Chi’s vezza tuot la val.
E la saira,
Las stailas guard sün tschêl.
Algordanzas
A quist, a quist bel temp.
Ohhh Ohhhh
Ohhh Ohhhh
Quists temps passan massa,
Massa svelt.
Pens a mincha mumaint.
Mia patria
Nu dun sü.
Tilla vez amo adüna davant mai.
E la saira,
Las stailas guard sün tschêl.
Algordanzas
A quist, a quist bel temp
Ohhh Ohhhh
Ohhh Ohhhh