Dapi 10 onns datti l'uschenumnada emna da chant a Tavau. L'occurenza è part dal «Davos Festival» che vul principalmain promover musicistas e musicists giuvens. Durant l'emna chantica datti differentas purschidas: Sper las provas regularas ch'èn mintgamai da las 17:00 e las 19:00, vegnan offerts era differents workshops che focuseschan sin differentas tematicas en connex cun chant da chor.
Il dirigent ed intendant da l'entir festival Marco Amherd vul pussibilitar a ses public da midar perspectiva per in'emna: Audituras ed auditurs duain survegnir la pussaivladad da far musica activamain durant in'entira emna. Chantar en in chor saja tenor el la varianta la pli simpla. Sper il chant sez pussibilitescha l'occurrenza era anc autras plivalurs.
L'emna da chant collia persunas ord ravugls dal tuttafatg differents.
Chantar sanadaivel
Ils lavuratoris che l'emna porscha cuntegnan differentas tematicas che stattan en connex cun il chant. In dals workshops è sa deditgà al motto «chantar a moda sauna». Il manader da quel è stà il giuven dirigent da l'Argovia Timo Waldmeier. Durant passa in'ura ha el preschentà e mussà differents exercizis che sustegnan la vusch, per ch'ella na vegnia betg strapatschada durant chantar. I na saja mai memia tard per emprender da chantar a moda sauna, di Timo Waldmeier.