Tenor Susanna Mazzetta ch'è advocata e che lavura dapi 24 onns tar il Post da stab da l'egualitad da las schanzas per dunnas ed umens dal chantun Grischun èsi impurtant da respectar mintga persuna sco ch'ella è. Tuttas e tuts duain vegnir tractads tuttina, guardond sin las pussaivladads ed ils basegns da las singulas persunas.
Sin la via a l'egualitad absoluta èsi da guardar che las persunas vegnan tractadas a moda uschè eguala sco pussaivel. Per exempel ch'umens e dunnas han ils medems dretgs, ch'i dat la medema paja per la medema lavur, etc.
Toleranza n’è betg acceptanza.
Co tractar tuts tuttina? Mintgin e mintgina da nus ha sias experientschas, ses satgados ch'influenzescha ses agir, sia tenuta. Sch’ina persuna en nossa societad prenda ina decisiun, stat adina ina part fitg subjectiva en questa decisiun, di Susanna Mazzetta. E quai pudain e vulain nus betg dumagnar davent. Nus pudain dentant guardar che la structura è uschia ch’ella curregia tschertas chaussas e che la glieud che decida è conscienta da tschertas chaussas.
Nossa societad dovra toleranza. Toleranza vul dir che nus acceptain insatge che nus n’essan betg d’accord e quai po viver sper nus.
Tge vul dir toleranza en connex cun l’egualitad? Va quai ensemen? Cura dovri intoleranza? Nua è la differenza tranter toleranza ed ignoranza? Respostas sin questas dumondas filosoficas – en Vita e cretta.
En chaussa egualitad datti tscherts cunfins ch’èn betg tolerabels.
