Igl è in spectacul, ina show – questas elecziuns per il presidi american. Mintga quatter onns èsi puspè il tema che dominescha sin l'entir mund. Tgi daventa la pli pussanta persuna sin terra? Il republican Donald Trump u la democrata Kamala Harris?
Questa emissiun na vul betg far in'analisa politica e guardar sin ils plans detagliads dals dus candidats. Na, la finamira è da sentir il puls e chapir pertge che las elecziuns americanas èn uschia sco quai ch'ellas èn.
A pled vegnan, tranter auter era Rumantschas-Americanas ch'èn da chasa dapi blers onns en ils Stadis Unids. Ellas che vivan la vita americana e ch'han er ina clera opiniun da quai che curra e passa actualmein en ils Stadis Unids.
Maria Luisa Ardini-Fontana (California)
- 93 onns
- oriunda da Cumbel
- dapi il 1962 en ils Stadis Unids
La dunna, oriunda da la Lumnezia è dapi var 60 onns en l'America. Dapi 50 onns abitescha ella a Pleasant Hill, datiers da San Francisco, ina regiun ch'è cleramain democratica. Uschia va sia vusch er a Kamala Harris. La dunna che posseda il pass svizzer ed american ha dapi ch'ella dastga eleger, adina elegì democratic. Per la dunna da 93 onns n'è quai nagina dumonda. Cun Donald Trump na possia ella entschaiver en schuber nagut.
Jau fatsch uraziun che Trump na vegn betg anc ina giada president.
Quai che vilenta spezialmain Maria Luisa Ardini-Fontana vi da Donald Trump è il fatg ch'el di uschè bleras manzegnas ed offenda tut las persunas che na plaschan betg ad el.
Kamala Harris saja tut in'autra persuna che sa preschentia cun bler dapli respect. E tge che plascha spezialmain a la Lumneziana vid Kamala Harris è ch'ella vul s'engaschar per il socialesser ed era per la glieud pli paupra.
Anita Turner (Texas)
- 66 onns
- oriunda da Trun
- dapi il 1983 en ils Stadis Unids
La dunna ch'è oriunda da Trun abita dapi var 40 onns en ils Stadis Unids. Ella è maridada cun in Texan ed abitescha ad Austin, la chapitala dal Texas. Anita Turner elegia tradiziunalmain republican, quai è er quest'onn il cas. Dentant di ella cleramain ch'ella na saja betg in fan da Donald Trump. Tuttina va sia vusch a l'um da 78 onns.
Fotografias dals ultims mais
-
Bild 1 von 7Legenda: Ils 14 da fanadur hai dà en il stadi da Pennsylvania in'attentat sin Donald Trump. El ha survivì l'attatga cun levas blessuras vid l'ureglia. Keystone -
Bild 2 von 7Legenda: Kamala Harris e ses slogan «for the people» – per la glieud. Keystone
-
Bild 3 von 7Legenda: In placat cun pleds clers envers Donald Trump. Keystone
-
Bild 4 von 7Legenda: Aderents da Kamala Harris. Keystone
-
Bild 5 von 7Legenda: In'aderent da Donald Trump cun ina gronda bandiera da reclama. Keystone
-
Bild 6 von 7Legenda: Donald Trump sco ins enconuscha el sin tribuna. Plain engaschi. Keystone
-
Bild 7 von 7Legenda: Ils 10 da settember hai dà il sulet duel da televisiun tranter Trump e Harris. Keystone
Anita Turner n'è betg in fan da l'interprendider. El haja dentant almain ideas cleras e proponia soluziuns per ils problems. Per exempel sch'i va per l'inflaziun u l'immigraziun. Kamala Harris è tenor la Sursilvana bler memia liberala. E sco vicepresidenta sut Joe Biden haja ella fatg tant sco nagut da vaglia. Donald Trump saja percunter in president che guardia per il bainstar dal pajais, era sche ses sa preschentar saja magari sgarschaivel.
Jau sun republicana cunquai ch'jau n'hai betg in'autra schelta.
I vegn spetgà ina decisiun piz a cup ils 5 da november. Suenter ch'i è vegnì dà or milliardas e milliardas per il cumbat electoral, decida il suveran american sche Donald Trump vegn per la segunda giada president american u sch'i dat cun Kamala Harris per l'emprima giada ina dunna al timun dal pajais.