(vallader) Avant cuort n’haja inscuntrà i’l tren a duos turists dals Stadis Units. Davo ün mumaint hana cumanzà a tematisar quai chi’s po leger eir pro nus illas gazettas: la polarisaziun dal cumbat electoral in lur patria e quant difficil chi saja dvantà da discuorrer da politica in quist’atmosfera tendüda, eir tanter amis e paraints. Quant spinus cha quai renda l’affar da chattar bunas soluziuns per tuots! As pensa cun buna radschun.
Co füss nos muond, schi regness plü gronda armonia?
Sco quella jada tanter ils prüms cristians, per exaimpel. Schi, las prümas raspadas ston esser stattas sco ün corp ed ün’orma: il Spiert sonch svess varà pisserà per ün’armonia celestiala. Inschinà nu vessa neir brich dat üna cretta mundiala our d’ün pitschen movimaint in üna provinza insignifichanta da l’imperi roman.
Ma l’incuntrari es stat il cas. Gnanca duos decennis davo la mort da Gesu as vaiva quist movimaint tuot tenor raspada sviluppà in maniera uschè differenta cha’l discuors tanter pêr d’eira dvantà difficil. As stessan tuots tegner vi da la ledscha religiusa dals Israelits? Che cumandamaint vaglia per chi? E finalmaing d’eiran – sco suvent tanter nus essers umans – ils raps üna radschun per discordia.
In quista situaziun da conflict esa svelt dvantà cler cha cun chartas o cun mess chi’s tramettaiva d’üna raspada in tschella, nu’s laschessan plü schoglier ils problems. Uschè parta Paulus probabelmaing l’on 48 vers Gerusalem per inscuntrar là als seniuors ed als apostels. Sco cha Lucas rapporta i’ls Fats dals apostels, sto la debatta esser statta lunga. Petrus, üna da las persunas importantas per la raspada a Gerusalem, surprenda finalmaing a Paulus ch’el cun ün votum decisiv propaghescha la generusità:
«[Dieu] nun ha fat ingüna differenza tanter nus ed els, davo ch’el ha nettià lur cours tras la cretta. […] Anzi, tras la grazcha da nos Segner Gesu crajain nus da dvantar salvs in l’istessa maniera sco els.» (Fats 15,9.11)
Il resultat es quel chi darà da quinderinavant ün’avertezza per la multifarietà in unità tanter ils prüms cristians – chi sajan oriundamaing stats güdeus o pajans, adüsats als cumandamaints religius dals Israelits o chi faivan part da la società da cultura greca derasada intuorn la part orientala dal Mar Mediterran.
Chi ha dat üna cretta mundiala our d’ün pitschen movimaint, nun ha dimena da chefar cun quai chi vess regnà ün’armonia celestiala sainza dispittas, ma chi s’ha imprais a schoglier problems cun l’agüd d’inscunters, discuors e: generusità.
Da quai po mincha società democratica d’üna o da tschella vart da l’Atlantic imprender üna pruna! Schi, forsa dafatta mincha singul uman.
Uschea giavüscha a tuots: Üna buna dumengia!