Pled sin via - Silvia Gartmann: «El porta pasch e giustia senza cumbatter»

(sursilvan) In affon porta ina frastga da palmas enta maun. Il plevon benedescha quella avon messa. A casa vegn la frastga da palmas messa davos la crusch da Niessegner – tochen ch’ella vegn remplazzada in onn pli tard cun ina nova frastga. Ina biala tradiziun. Mo daco festivein nus la dumengia da palmas? 

Avon biebein 2000 onns duvrava il pievel da Jerusalem frastgas da palmas e d’ulivas per festivar ina victoria e la pasch. Aschia era il di cura che Jesus ei arrivaus a Jerusalem. Il pievel ha beneventau il profet ch’ei arrivaus sin in asen cun frastgas da palma e d’ulivas. Aschia ha il pievel cartent da Jerusalem fatg beinvegni a siu messias. El sperava che Jesus libereschi els digl imperi roman. Mo co duei quei gartegiar ad in um che va a cavagl sin in asen?

Sin fundament dallas scartiras dil Veder Testament – numnadamein dil profet Zacarias – cartev’ins ch’il Salvader vegni in di a cavagl sin in asen. Il ver salvader vegni pia buca a liberar cun armas e cavalcond sco in imperatur sin in cavagl, mobein el vegni ad arrivar tut mudests sin in asen. Quei Salvader vegni a purtar pasch e giustia senza cumbatter. 

Avon vegn il Salvader denton a pitir. La dumengia da palmas ei l’entschatta dalla davosa jamna da cureisma, ni era la jamna dil pitir. La sontga Tscheina, la lavonda dils peis, il plaid da cumiau, il tradiment, il process e la crucifigaziun vegnan a suandar avon che la levada sa vegnir festivada da Pastgas. Pér la levada da Pastgas lai nescher e crescher els cartents la speronza sin ina pasch eterna suenter la mort. 

La speronza sin quella victoria festivein nus ina jamna avon Pastgas, pia la dumengia da palmas. Nus festivein magari buca cun frastgas da palmas ni d’ulivas, mobein nossas frastgas da pegn che simboliseschan medemamein quella speronza silla victoria gloriusa.  

Silvia Gartmann ha studegià scienza da religiun, sociologia, sinologia ed informatica. Ella instruescha a la Scola Chantunala a Cuira.