(sursilvan) Jeu siemiel gia dapi entgins onns da far in viadi da pelegrinadi ensemen cun miu um. Sco ei vesa ora el mument, ei il temps aunc buca madirs per quell’aventura.
Il patratg dil pelegrin e dil pelegrinar lai denton buca ruaus a mi ed aschia haiel jeu tessiu vinavon mias ponderaziuns davart il pelegrinar en miu tgau.
Sche nus dein in sguard anavos sin la historia dil pievel da Diu, lu savein nus constattar ch’il pievel da Diu ei adina staus sin viadi. Ch’el ei adina s’identificaus cun il pelegrinar. Il cartent sesenta sco hosp sin quest mund. El ei sia veta duronta sin via alla tscherca dil senn dalla veta ni alla tscherca da Diu.
Gia la historia dad Abraham raquenta a nus digl esser sin viadi dil pievel da Diu. Abraham vegn menaus sin siu viadi en ina nova patria. El va quella via cun sefidar da Diu.
Pelegrinar munta per mei persunalmein in seschar en sin la midada. Esser aviarts ed attents per ina sentupada cun Diu. Esser prompts d’enconuscher Jesus cura ch’el cumpara.
El Veder Testament ei il pelegrinar colligiaus cun in liug sogn. Cunzun Jerusalem valeva per ils cartents da gliez temps sco liug da pelegrinadi. Il pelegrin drova pia ina finamira. In liug sogn, in liug che porta grazia e salit. Igl ei in liug nua ch’ins senta la preschientscha da Diu.
Loghens da pelegrinadi ein loghens per tancar energia. Loghens per rimnar da niev las forzas, per cuntinar la via dalla veta. En muments da fleivlezia e dubis sun jeu adina puspei fascinada dalla historia dil profet Elia. Elia ei staunchels dalla veta. El ei unfis da cumbatter encunter il Diu Bal e perschuader ils carstgauns da sevolver viers nies Diu. Elia serenda el desiert ed enquera Diu per sefar libers da siu pensum. Quel che vegn clamaus da Diu, vegn denton mai libers da sia clamada. Sil cuolm Horeb astga Elia, sco paucs auters carstgauns, sentir profundamein la vischinonza da Diu. En in suffel fin cumpara Diu ad el e renovescha cheutras sia clamada. En quei liug solitari e sogn contonscha siu viadi il zenit. Rinforzaus semetta el puspei sin via.
Nus sesanflein el temps da Cureisma. Nus caminein enviers Pastgas sils fastitgs da Jesus. Treis gadas ei Jesus, tenor igl Evangeli da Gion, pelegrinaus duront sia veta a Jerusalem. Cuort avon la gronda fiasta da Pessach, la gronda fiasta da pelegrinadi dils Gedius, succeda la passiun da Jesus. Ils giuvnals da Jesus accumpognan buca el duront siu davos viadi el marcau sogn. Mo entginas dunnas stattan tier Jesus entochen alla fin. Ellas ein pia las empremas pelegrinas dalla via dalla crusch da nossa baselgia.
In pelegrin ei aviarts e prompts per puspei seschar menar sin la dretga via. In pelegrinadi ei buca adina mo emperneivels. Il viadi sa esser stentus e metta nus sin l’emprova. In tal viadi sa era midar nus dil tuttafatg e cheutras era nies contuorn.
Era il viadi dils giuvnals che ein sin via da Jerusalem encunter Emmaus semida naven dalla tristezia e trumpada en profunda legria e speronza. La sentupada cun Jesus dat ad els la motivaziun da cuntinuar il viadi e d’annunziar la levada da Niessegner Jesus Cristus viadora el mund.
Pelegrinar munta per mei persunalmein in seschar en sin la midada. Esser aviarts ed attents per ina sentupada cun Diu. Esser prompts d’enconuscher Jesus cura ch’el cumpara. Pelegrinar munta per mei era da viandar adina puspei tier sesez. Ir alla tscherca da nies esser persunal ed aschia anflar la clamada che Diu ha dau a nus.
El psalm 126 legin nus ils suandonts plaids:
Quels che semnan cun larmas
Raccoltan cun legria.
Quel che porta il sac da semenza,
Va a bargend sur igl èr.
Mo cu el tuorna a casa, purtond sias monas,
Eis el plein giubel.
Emplenida da speronza pelegrineschel pia vinavon sin mia via e selegrel d’entupar in ni l’auter da Vus sin quei viadi.