Dapi meins vivin nus cun quella pandemia Covid-19. Per nus ei nossa veta semidada. Viagiar ei daventau fetg cumplicau, sentupar in cun l’auter era. Mo aunc da bia autras caussas stuein nus desister. Gie, ins astga dir che nus essan restrenschi e stuein tener distanza. Il persunal ed ils miedis els spitals ston prestar ina immensa lavur. Ils cuosts s’augmentan fermamein ed entginas branschas stattan avon problems irreparabels.
Patertgein era vid las consequenzas economicas che laien en bia tiaras segns da malsegirtad pigl avegnir. Persunas ch’ein a nus caras mieren. «Paupers vegnan aunc pli paupers» – tut quei dat a nus da patertgar. Nus daventein pli reservai enviers in l’auter. Quella malsegirtad impedescha nus da sentupar sco nus eran endisai e da svilupar e cultivar nossas relaziuns interhumanas.
In proverbi latin di: HOMO HOMINIS LUPUS EST (il carstgaun ei in luv per ils carstgauns). Mo aschi lunsch astga ei buca vegnir. Jeu concedel che vivend questa pandemia stuein nus esser attents, prudents e suandar las leschas perscrettas per proteger nusezs ed ils auters. Mo nus astgein buca emblidar in l’auter. Oravontut quels che sesanflan buca dalla vart sulegliva en lur veta.
Amazonas – el cumbat encunter il Covid
La Brasilia annunzia in niev e trest record il schaner vargau: 220 000 persunas ein mortas da Covid. En la statistica mundiala ein els sil secund plaz. Ella regiun digl Amazonas che vegn era numnada «il lom dil mund» maunca gl’essenzial: numnadamein «oxigen». A Manaus, ella capitala digl Amazonas, anflein nus ina gronda tragedia: nua anflar ina butteglia dad oxigen? Per saver cumprar igl oxigen ston entgins duvrar si lur respargns ni far deivets. Ei dat persunas che han schizun stuiu pagar 900 Euros per 3 uras supplementaras cun oxigen. Il sectur da sanadad ei curdaus ensemen. Il schaner 2021 ein ella regiun digl Amazonas 2195 persunas mortas da Covid. In augment da dapli che 700 pertschient cumparegliau cul meins december 2020.
Libanon – la meisa da « Sogn Gion il misericordeivel »
Cumparegliau cun la populaziun indigena ei il Libanon la tiara che dat globalmein il pli grond albiert a fugitivs. Denter els sesanflan biaras famiglias cristianas ch’ein fugidas dalla Siria duront l’uiara dils onns 2011-2019.
Dapi in per onns ha la baselgia aviert a Zahlé, in marcau en la planira dalla Bekka, sils confins cun la Siria, in liug da sentupada che senumna la meisa da «Sogn Gion il misericordeivel». Mellis e mellis spitgavan di per di avon la pandemia leu sin ina tschavera caulda. Cun la crisa economica ed il bancrott dil stadi libanes s’augmenta la cefra incuntin. Era la famiglia Rief, ch’ei scapada avon 3 onns dil bombardament en Siria, vegneva regularmein a la sentupada. Il bab, cuschinier en in restaurant, ha piars sia lavur entras la pandemia Covid-19. Els speren sin in meglier avegnir.