Pled sin via - Mirella Candreia: «Jau hai gì tema da questa midada»

(sursilvan) Jeu stun per il mument avon midadas. Jeu stosel prender ina gronda decisiun che pertucca mia veta professiunala. Ils davos onns ha ei dau biaras da quellas decisiuns significantas en mia veta.

Avon 10 onns hai jeu giu in’idea dètg fixa sco mia veta duei veser ora cura che jeu sundel 30. Ussa sundel 30, mo mia veta ha priu in’autra via. Da lezzas uras havess jeu mai tertgau che jeu dundel inaga si miu grond siemi dad esser ina schurnalista che lavura en ina gronda casa da medias. Aber avon in onn hai jeu decidiu exact quei. Jeu hai disdetg la plazza che era ditg in siemi per mei. Quella decisiun era buca leva per mei. Jeu hai unfriu bia per haver quella plazza. Mo sco quei ei magari cun talas finamiras. Sch’ins contonscha ellas, lu eis ei savens gnanc aschi cuntenteivel. La finamira tarlischa magari ella realitad pli pauc ch’ella imaginaziun.

Quella decisiun ha duvrau temps ed era curascha. Dar si ina plazza segira senza saver co ei va vinavon ei buca stau lev. Interessant ei era che jeu havevel tema da quella midada, schegie che jeu hai l’impressiun che jeu sundel atgnamein ina persuna che beneventa midadas. Adina puspei semidan differents aspects da mia veta ed il bia selegrel jeu era sin quellas midadas. Mo quella ga eri auter.

Ella cultura populara englesa ed americana, per exempel en films, hai jeu schon udiu la frasa: «The only constant is change.» La suletta constanta ella veta ei la midada. Quella frasa ei inspirada dalla filosofia dil filosof grec Heraklit. El ha observau che la natira semida permanentamein ed el ha cumpregliau quei culla veta. La filosofia da Heraklit muossa era ch’ins sa buca crescher persunalmein sch’ins stat eri. Ei drova il moviment, la midada e forsa era ina certa resca d’empruar novas caussas. Quella filosofia ha gidau mei da far il segl el nunenconuschent.

Oz, puspei confruntada cun ina gronda decisiun en mia veta professiunala, sundel jeu fetg ruasseivla. Jeu hai oz ina fidonza en memezza che jeu hai la habilitad da s’adattar. E jeu sai che mintga decisiun, mintga midada sa esser ina schanza per miu svilup persunal. Ils davos onns hai jeu empriu che tut vegn adina auter che quei ch’jeu hai tertgau, e che quei ei savens era bien aschia.

Podcast Pled sin via

Il «Pled sin via» dat mintg’emna in impuls teologic, spiritual u etic e metta en il center l’uman ed il mintgadi.

Ulteriurs audios e podcasts

Podcast Vita e cretta

L’ura da religiun è ina oasa da tempra religius-meditativa cun novitads or dal mund da las religiuns, predi/meditaziun e dapli.

Ulteriurs audios e podcasts