(sursilvan) Donald Trump procura adina puspei per lingias grassas! Dapi ch’el ei turnaus en Cas’alva a Washington, dat ei quasi mintga di novitads e decisiuns che fan surstar e smarvigliar. – El ei in um dils gronds plaids, in um ch’ei detscharts da sias ideas, in um che sevesa sco spindrader dils Stadis Unids. Siu retuorn politic ha el annunziau sco in grond «comeback»: el seigi quel che metti tut en uorden; el seigi quel che fetschi «America great again».
Sper tut quellas lingias grassas che nus udin quels dis, dat ei questa dumengia era ina novitad dad in «comeback». Igl ei il messadi da Pastgas, il messadi dalla levada; in «comeback» che funcziuna empau auter.
Jesus ch’ei levaus da mort en veta, drova buca las grondas tribunas da quei mund. El enquera buca pussonza ed ei era buca turnaus per far vendetga. Ils raquents biblics drovan buca lingias grassas per tematisar la levada. E negliu aud’ins in grond plaid da Jesus, sco: «Jeu sun il salvader, jeu sun turnaus per metter tut en uorden!» ni «Jeu hai adina schon giu raschun!». – Sch’ei vegn tschintschau dalla levada, lu plitost en tuns migeivels.
In bi exempel ei per mei la historia dad Emmaus nua che dus giuvnals eran sin via a casa. Els eran trumpai da quei ch’era schabegiau, trumpai che lur speronza en Jesus ei buca secumplenida. Ad in jester raquentan els ch’els hagien tertgau che quei Jesus vegni a spindrar Israel, mo ussa eis el morts e cun el era lur speronza. En lur trumpadas sentan els gnanc che quei jester ei Jesus e ch’el ei sin via cun els. El teidla tier, el ei ruasseivels e lai tschintschar els. Pér alla fin dad in viadi pli liung, cura ch’els partan il paun duront ina tschavera, sentan quels dus giuvnals: el, sin quel ch’els vevan mess tutta speronza, era gl’entir temps cheu! El era cheu, enamiez lur trumpadas ed ha dau nova speronza.
Jesus ch’ei levaus da mort en veta, drova buca las grondas tribunas da quei mund. El enquera buca pussonza ed ei era buca turnaus per far vendetga.
Forsa ei quei in messadi particular da Pastgas: la levada ei segir buc in grond «comeback» el senn classic ed ha era nuot da far cun in retuorn cun gronda pumpa e maiestad. Tier Pastgas stat in auter patratg el center: numnadamein la speronza. Ei va per ina speronza che drova buca lingias grassas e gronds plaids. Igl ei ina speronza che glischa si enamiez tut las trumpadas e stgiradetgnas da nossa veta. E quella experientscha han era ils giuvnals fatg suenter la mort da Jesus: el ei cheu, el ei sin via cun els, era sch’els han manegiau d’esser persuls e bandunai. – Pastgas ei negina «show». Pastgas ei ina nova entschatta e quei buca sillas grondas tribunas, mobein sin via. Cun tei. E cun mei.