(sursilvan) Questa fin d’jamna passentel jeu ina notg sin ina camona alpina ellas muntognas glarunesas. Che jeu fetschel da quellas caussas, ei era empau la «cuolpa» da mia partenaria! – En sia famiglia eis ei schon daditg tradiziun ch’ins fa inaga ad onn communablamein ina pintga tura cun star surnotg en ina camona.
Planisau e reservau ils plazs da durmir ella camona ha siu aug gia avon in miez onn. Dapi lu sai jeu tgei che spetga mei ils 13 e 14 da fenadur: in plaz da durmir sin 1770 m s.m., franc ina buna tscheina, sco era in solver che dat nova forza ed energia per la viandada dalla dumengia.
Esser hospiteivels munta lu buca mo far in survetsch agl jester che splunta vid la porta, mobein era da far quei survetsch cun premura e cordialitad!
Gia quellas paucas informaziuns dattan empau segirtad a mi, aschia che jeu stoi buca far quitaus co e nua che jeu passentel la notg. Cun ina sempla reservaziun sur internet eis ei schon fatg! – Mo co era quei pli baul? Avon il temps da telefon ed internet? Co fuva quei pli baul sin in viadi pli liung ni schizun sin in pelegrinadi?
Da lezs temps eran ils carstgauns segiramein pli dependents in da l’auter. Ei duvrava carstgauns ch’eran promts dad arver las portas da lur casas e promts da dar suttetg, spisa e bubronda. Senza la bunaveglia e senza la hospitalitad dalla glieud era ei strusch pusseivel da far in viadi pli liung!
Che la hospitalitad era ina valur fetg preziusa ed impurtonta ella convivenza da lez temps, da quei dat era sogn Paul perdetga en ina da sias brevs (cf. Heb 13). Sch’el tschontscha leu dalla hospitalitad, lu drova el il plaid grec «xenophilia», tgei che munta aschi bia sco «carezia enviers igl jester». Esser hospiteivels munta lu buca mo far in survetsch agl jester che splunta vid la porta, mobein era da far quei survetsch cun premura e cordialitad! Il hosp ch’ei gie jasters en quella casa duei sesentir beinvegnius; ni sco jeu hai era schon legiu: «Hospitalitad ei, sche carstgauns sesentan dacasa, schegie ch’els ein buc a casa.»
Era sche questa fin d’jamna culla tura stat aunc avon porta, sai jeu franc dir che jeu vegn ad haver in suttetg ellas muntognas glarunesas. Mo sche jeu vegn era ad haver in «dacasa» dependa empau dalla cordialitad e hospitalitad dil guardiacamona e da siu persunal. – E sche quei fuss lu propi il cass: Tgei less ins aunc dapli ch’in «dacasa» ch’ei aschi datier dil tschiel?
