Tge è ina buna ospitanta? Datti insumma ina ospitanta perfetga, damai ch’ils gusts dals giasts èn gea differents? Talas dumondas fa Vita e cretta a Sandra Brunner-Decurtins, oriunda da Tinizong, che maina il restaurant Calanda a la plazza da la posta a Cuira. Quai fa ella dapi l’onn 1997, a l’entschatta anc ensemen cun ses um. Suenter la mort da l’um ha Sandra Brunner-Decurtins manà vinavant trais manaschis da gastronomia suletta, schebain ch’ella aveva trais uffants pitschens a chasa.
Jau na sai era betg pli co che jau hai dumagnà tut. Per esser gastronoma m’ha franc gidà mia amur sincera e profunda per la professiun.
Oz, 27 onns pli tard, ha ella creà in pitschen imperi. Ensemen cun sia figlia la pli veglia maina ella ina da las ustarias cun il pli grond success a Cuira ed è scheffa da var 40 collavuraturas e collavuraturs. Sandra Brunner-Decurtins è ustiera cun corp ed olma.
Sco ospitanta less jau esser ina part da las bellas experientschas che mes giasts fan. Jau hai da satisfar ils pli differents basegns, natiralmain er quels da mia squadra.
Tge ch’è caracteristic per ella sco gastronoma, co ch'ella vegn a frida cun pretensiuns e spetgas da tut las varts e sin tge plaschairs e difficultads ch'ella frunta en il mintgadi, quai tradescha Sandra Brunner-Decurtins en la seria da stad da Vita e cretta. En quella ans dumandain nus tge che l'amur è, l’amur per las pli differentas chaussas u occupaziuns.
Jau na poss betg plaschair a mintga giast. Ma quai na stoss jau era betg.
![Das Restaurant Calanda in Chur, welches Sandra Brunner seit 27 Jahren erfolgreich führt, ist ein beliebter Treffpunkt.](https://www.rtr.ch/static/cms/images/960w/3c2f02b.jpg)