Pled sin via - «Con bugen che jeu crei en Diu»

Atgnamein vevel jeu gia scret e registrau auditiv il «Pled sin via» per la proxima ediziun. Mo lu hai jeu legiu ed udiu ils patratgs ch’ Orlando Cadonau veva fatg per la dumengia vargada. El raquenta da siu confess d’esser ateist, da sias resalvas enviers l’instituziun dalla Baselgia e da sias damondas, sin las qualas el anfla buc ina risposta cuntenteivla en la religiun. A moda surprendenta ed aviarta ha el era confessau ch’el cartess bugen e ch’el empermettess da quella cardientscha levgiament, consolaziun e speronza. Quei tut scriva el a moda reflectada e senza offender talas e tals che crein.

Siu «Pled sin via» ha contonschiu mei, ha buntganau e plidentau mei. Aschia hai jeu buca saviu far auter che rispunder. Jeu less bugen rispunder ad Orlando cun confessar che jeu creiel en Diu e sesentel tuttina, ni malgrad mia cardientscha, libra. Che jeu vesel il raquent biblic dalla scaffiziun buca sco in’emprova dils carstgauns da declarar co il mund ein daventaus, mobein pertgei ch’el ei daventaus. E che jeu vesel Diu buca sco in che diregia miu tscheff dalla veta, mobein ch’el ei cun mei el tscheff – duront dis da bun’aura ed era el stemprau.

Orlando sereferescha sin il filosof e criticher da religiun, Karl Marx, e sil patratg che la religiun seigi opium dil pievel. Fagend mia oraziun dalla sera ei in surrir sgulaus sur mias levzas, patertgond che jeu tragi uss en mia purziun opium avon che durmir. Mia cardientscha gida mei senz’auter en las pli differentas situaziuns da mia veta e dat adina puspei orientaziun sin via. Auter ch’ ina droga fa ella denton buca dependenta ed ella procura plitost per sulegl che per nebla en mes patratgs. E da principi enneu ei era buca da quintar cun schliats effects secundars.

Ils patratgs d’Orlando lain sentir ch’el ei alla tscherca. Quei sun jeu era, pertgei era sco cartenta hai jeu buc il sentiment dad haver anflau la verdad. Crer vul dir encurir. En quei senn vesel jeu il confess dad Orlando sco impuls da reflectar miu agen crer. Dubis haiel era jeu enqualga. Els bintgunan mes fundaments da cardientscha e controlleschan, schebein jeu hai baghegiau sin bien fundament.

E sco Orlando teidlel era jeu magari Pascal Gamboni. Per oz duei valer quei che lez ha era detg: Ussa fo in punct.